Hripui vei enkawl lai mi 1,649 (1.18%) chiah awm

December 20, Thawh­ṭanni khan Mizoramah Covid-19 vei mi 217 hmuh chhuah a ni. Nimin khan hripui vei dam tawh mi 220 chhuahtir an ni a, hripui vanga thi an awm lo. Nimin tlai dar 5 thlengin Covid-19 vei enkawl lai mi 1,649 an awm mek a, hmuh tawh zat aṭangin 1.18% chiah a ni tawh.

Covid-19 vei hmuh thar mi 217-te chu mipa 93 leh hmeichhia 124 an ni a; ZMC RT-PCR laboratory-a hmuh chhuah 30, TrueNAT hmanga hmuh 27, RAT hmanga hmuh 159 leh Fluorescent Immunoassay hmanga hmuh pakhat an ni. 

IDSP record angin, Mizoramah Covid-19 vei 1,39,705 hmuh chhuah a ni tawh a, mipa 67,379 leh hmeichhia 72,326 an ni a, mipa aiin hmeichhia 4,947-in an tam zawk. Nimin tlai dar 5 thleng khan mi 1,37,523 (98.44%) chhuahtir an ni tawh a, mi 533 (0.38%) thi tawhin, enkawl mek mi 1,649 (1.18%) an awm.

December 20, Thawhṭannia Covid-19 vei hmuh thar mi 217 zingah symptom nei mi 104 an awm a, mi 113 erawh chu symptom nei lo an ni thung. Thawhṭannia swab sample endikah positivity percentage 10% aia a sanna district pahnih chiah a awm a, Kolasib district 33.33% leh Khawzawl district 19.44%-te a ni.

Kum 2011 chhiarpui aṭanga chhûtin, Mizorama Covid-19 vei hmuh tawh 1,39,705 chu mi 1,000 zelah hripui vei mi 127 an awm ang a ni a; mi 1,00,000 zela Covid-19 vangin mi 48 an thi tawh ang a ni tih sorkar thuchhuakin a tarlang.

IDSP tarlan danin, nimin tlai dar 5 thleng khan hripui vei dam tawh mi 220 chhuahtir an ni a; district tina chhuak zat chu - Aizawlah mi 155, Serchhipah 25, Lungleiah 10, Champhaiah pariat, Lawngtlai leh Mamitah panga ve ve, Siaha leh Kolasib-ah pali ve ve, Hnahthialah pathum leh Saitualah pakhat a ni.

Mizorama swab sample endik tawh zawng zawngah RT-PCR hmanga endik zat percentage ni tin a tlahniam hret hret zel a, RAT hmanga endik zat a pung zel thung. December 20, 2021 thlenga swab sample endik tawh 14,85,514 aṭanga RT-PCR hmanga endik zat percentage chu 22.15 a ni a, RAT hmanga endik zat chu 71.98% a tling.