Bawrhsap Pisapui kâng an tlawh

December 17, 2021 zinga Aizawl Bawrhsap Pisapui kâng chhia chu nimin khan minister Dr R Lalthangliana’n a tlawh a; Mizoram Pradesh Congress Committee (MPCC) office bearer tharte’n an tlawh bawk.

Bawrhsap Pisapui kâng chhia nimin zinga tlawhtu Dr R Lalthangliana chuan, Bawrhsap Pisapui chu British kutchhuak, British-in Mizoram a awp laia sak tawh, eng sorkar mahin an tihdanglam phal loh a ni tih a sawi a, “Zo fate hmun leh in hlu tling, a chhunga lehkha pawimawh tak tak leh file hlu tak tak dah khawmte mit khap kar loa meivâpa a chang ta mai hi chànna nasa tak a ni,” a ti.

Dr R Lalthangliana hian bawrhsap Pisapuia duty-te tan pawisa, kutkawr, kut tihfaina leh hmai tuamna eng emaw zat a pe a ni.

MPCC hruaitute - president Lalsawta, vice president Lal Thanzara, treasurer Zodintluanga Ralte leh MPCC Media department hruaitute pawhin nimin khan Bawrhsap Pisapui kâng chhia an tlawh a; kângmei chhuak chu pawi an tih thu leh a kan chhan leh mawhphurtute rang taka sorkarin a chhui chhuah an duh thu te, sorkar building leh hmun hrang hrangah thil pawi a thlen tawh loh nan ruahmanna rang taka siam tura Mizoram sorkar an duh thute an sawi.