Minister-in Chhipphir YMA jubilee hmanpui

Chhipphir Branch YMA chuan nimin khan Chhipphir YMA Zawlbukah golden jubilee an lawm a, minister of state Robert Romawia Royte-in hmanpuiin, jubilee lungphun a hawng.

Robert Romawia Royte chuan, Mizorama khaw hlun leh khaw upa berte zinga mi Chhipphir khuain YMA golden jubilee hmang theia Pathianin a hruai chu lawmawm a tih thu sawiin, “Pawl huap zau leh zahawm, ramri nei ve lo, Zo fate min khaikhawmtu pawl ropui tak YMA kan nei hi kan vannei tak zet. Pathianin Zo fate YMA min pe hi lawmthu i sawi nawn ang u,” a ti a; khaw mipuite chu inhmangaiha inlungrual zel turin a chah.

Minister hian Chhipphir khuaah volleyball court leh futsal ground-te ruahman sak tura hmalak a tum thu a sawi a; bialtu MLA Dr Vanlalṭanpuia’n Chhipphir YMA Library thar, Raja Rammohun Roy Library Foundation (RRRLF), Kolkata kaltlanga Rs 6,00,000 sênga sak a hawng a, thu a sawi bawk.

Robert Romawia Royte hian Chhipphir YMA Library-a hman tur computer a pe a; jersey, table tennis dawhkan leh football a pe bawk. Chhipphir Branch YMA-ah hian member 734, mipa 447 leh hmeichhia 287 an awm mek a ni.