Mizorama NH siam mek Larsap hrilhfiah

National Highways Infrastructure Develop­ment Corpo­ration Limited (NHIDCL) hotute chuan nimin khan Governor Hari Babu Kambhampati chu Raj Bhavan-ah an kâwm a; Mizorama national highway sial mek dinhmun leh hmalakte an hrilh.

NHIDCL executive director Virendra Kumar Jakhar chuan, Mizorama NHIDCL-in hna an thawh mek - Aizawl-Tuipang, Aizawl-Champhai, Sairang-Vairengte kawngpui lirthei pali tlân theihna (four lane) tur leh Aizawl by-pass road an thawh mekte a sawifiah a; hmun ṭhenkhata harsatna an tawhte chinfel thuai a ṭul thu a sawi.

Governor chuan, NHIDCL-te harsatna chu chinfel vat a nih theih nan a ṭul angin state sorkar thuneitute a sawipui tur thu a lo hrilh.

NHIDCL hotute sawi danin, Mizoramah km. 784-a thui NHM enkawl, chei ṭhat leh sial mek an nei a; km. 397-a thui Aizawl-Tuipang inkar, km. 69-a thui Seling-Dulte inkar leh km. 68-a thui Dulte-Champhai inkar kawngte zauh hna an thawk mek a ni.

Km. 84-a thui Keifang-Tuivai inkar leh km. 91-a thui Sairang-Vaireng inkar kawng sial leh zauh hna pawh ṭan thuai an beisei a; Aizawl hêlna tur km. 39-a thui Aizawl by-pass road ruahman mek a ni a, NH-ah puan a la ni lo thung.