MLPC Act vanga hlâwkna Re. 1-ah Rs. 2.85 zel hloh angin chhût a ni

31st July, 2018

The Mizoram Liquor (Prohibition and Control) Act, 2014 (MLPC Act) chungchang zir chiangtu Study Group zir chiannaa a lan danin, MLPC Act hmanga zu zawrh vangin Mizoram sorkarin hlâwkna a hmuh theih chu Rs. 1,05,20,58,100 (vbc. 105.20) a ni a, sum senso erawh Rs. 2,99,49,25,550-ah chhût a ni thung. Hlâwkna Re. 1-ah Rs. 2.85 zel hloh ang a ni.

MLPC Act Study Group hian nimin khan Assembly Annexe conference hall-ah MLPC Act an zir chianna chungchang zirna leh sawihona an buatsaih a; Study Group convener Dominic Lalhmangaiha chuan, an zir chianna chu kum hnih chhung data a nih thu sawiin, "MLPC Act nghawng kan zir chianna hi a dik ber kher lo thei a, a chhan chu MLTP Act (zu khap burna dan) hman hun laiin data mumal a awm loh vang a ni," a ti.

Study Group-a principal investigator Dr Laldinliana Varte chuan, an zir chiannaah hian a tak taka sum hmanna ni lote pawh sumin a hlutna chhut chhuah a nih thu a sawi a; a taka sum hmuh leh hmanna aṭang leh a hlutna chhût chhuah aṭang chuan MLPC Act hnuaia zu zawrh leh a kaihhnawih thil hrang hrangte chhût chhuah a nih thu a sawi.

Dr Laldinliana Varte chuan, MLPC Act hnuaia Mizoram sorkarin sum a hmuh theih (benefit) chhut chhuah chu Rs. 1,05,20,58,100 (vbc. 105.20) a nih laiin, sum senso erawh chu Rs. 2,99,49,25,550 (vbc. 299.49)-ah chhût chhuah a nih thu sawiin, "Hei hi Re. 1 hmuhnaah Rs. 2.85 sêng zel ang a ni," a ti.

MLPC Act vanga suma hlâwkna a hmuh theihna tarlante chu - zu hralhna aṭangin Rs. 23,52,46,451 te, zu chhiah tax Rs. 12,45,42,239 leh excise duty Rs. 40,91,42,682, zu rûite pawisa chawi Rs. 12,00,000 leh zu in ṭhinte hlimna/hlawkna Rs. 28,19,26,728-te a ni a; a vaiin Rs. 1,05,20,58,100 a ni.

MLPC Act vanga sum sênna hlawm tarlan tlangpuite chu - zui in/ruih vanga chetsualna, zu rui chunga lirthei khalhte pawisa chawi, zu kaihhnawiha hna thawh loh vanga sum hloh, zu vanga hna chawlhsan, nunphung a tihbuai dan, zu vanga thih hma-na, zu vanga thil thlenga inenkawlna senso, zu vanga police-te sum hman leh an hun hman hlutna, zu vanga Court rorelna atana sum sen, jail tàn vanga sum hloh, Excise deptt. sum senso, kohhran leh khawtlang senso leh khawtlang a tihbuainate a tel.

MLPC Act Study Group hian Aizawla zu lei phalna card (liquor card) nei 51,898 aṭangin mi 382 thlang chhuakin, chu'ng mite chu zawhna chi hrang hrang an zawt a ni.

MLPC vanga sum hmuh leh senso chhûtna tlangpui
Sector Senso (cost) Hlâwkna (benefit)
Accident Rs. 16,00,000 Consumer surplus Rs.28,19,26,728
Fines from drunken driving Rs. 12,00,000 - -
Consumer Loss of productivity Rs. 9,48,32,780 - -
Unavailability of
labour market Rs. 2,94,60,222 - -
Effects on quality of life Rs. 2,40,69,978 - -
Premature death Rs. 2,57,29,23,518 - -

Retail - - Warehouse &
vendor profit Rs.23,52,46,451
Tax & - - Tax Rs.12,45,42,239
Duties - - Duties Rs.40,91,42,682

Health cost Trauma/injury/accident Rs. 4,09,64,000 - -
Health care Rs. 6,35,36,955 - -

Police & Police effort Rs. 3,63,00,847 Drunken fine Rs. 12,00,000
Judicial Judicial cost Rs. 2,67,00,000 - -
Detention cost Rs. 12,09,065 - -

Authority Excise effort Rs. 9,23,48,755 - -
Church Church effort Rs. 72,46,434 - -
Others Productivity loss Rs. 25,32,996 - -
in society

TOTAL - Rs. 2,99,49,25,550 - Rs.1,05,20,58,100
Ratio - 2.85 - 1