ṬKP-in an dinchampha Vawi 67-na an lawm

Nimin, July 30 kha Ṭhalai Kristian Pawl (ṬKP) din champha, ṬKP Day vawi 67-na a ni a, Mizoram leh Mizoram páwna ṬKP unit hrang hrangte'n an hmang. Chhun lam chu khawtlang leh mi dangte tana thil ṭha tihna atana an hmang a, zanah inkhawm buatsaih niin, thupui chu 'Pathian chung lam koh chhan' tih a ni.

ṬKP Day lawm nan hian Kolasib bial ṬKP chuan BCM Kola­sib Kohhran hall-ah blood donation camp huaihawtin, District Hospital Kolasib tan thisen unit 30 an pe a, a petute mipa 23 leh hmeichhia pasarih an ni. Hnahthial Bazar bial ṬKP pawhin an Kohhran Hall-ah thisen an pe a, Lunglei Civil Hospital tan mipa 41 leh hmeichhia 10-te'n thisen unit 51 an pe. Lawngtlai Kanan Unit-te pawhin Lawngtlai District Hospital tan thisen unit 23 an pe a, a petute mipa 20 leh hmeichhia pathum an ni.

ṬKP hi July 30, 1951-ah Serkawn, Lungleiah din a ni a, tunah hian pastor bial 84-ah ṬKP unit 484 awmin, member 46,155 an awm a, mipa 28,444 leh hmeichhia 17,711 an ni.