Khaw pakuaa kawngpui dan titawp ; Sikul & pisa khâr chhunzawm zel

Mizorama lump sum grant-in-aid higher secondary school (HSS) pakuate adhoc grant-in-aid dinhmuna hlankai phût vanga kawngpui dan chu nimin chawhnu dar 2 khan tihtawp a ni a; khaw pakuaa sikul leh sorkar pisa zawng zawng erawh la khâr chhunzawm zel a ni.

Lump sum aided HSS awmna khaw pakuaa zirlai pawl inzawm khawm, Joint Students Union (SU) chuan thuchhuah siamin, "Lumpsum aided HSS-te adhoc grant-in-aid a hlankai phûtna kal zelah Sakawrdai, Zawlnuam, West Phaileng, East Lungdar, NE Khawdungsei, Phullen Zobawk, Thingsulthliah leh Farkawn-a road block neih mek chu sorkarin kan ngenna min tihhlawhtlinsak a tum tak loah chuan, ruahmanna

ṭha zawk nena hmalak chhunzawm ni se kan ti a; chuvangin, July 30, chawhnu dar 2 hian call-off rih tur a ni tih kan inhriattir a ni," an ti.

Joint SU chuan, khaw pakuaa sorkar office leh zirna-in zawng zawngte erawh chu la khâr chhunzawm tur a nih thu an tarlang a; an kal zel dan tur chu naktuk Nilaini hian an ngaihtuah dawn thu an sawi bawk.

Lump sum aided HSS pakuate thil phût chungchanga Home minister R Lalzirliana hoa a ina Finance minister Lalsawta, School Education minister H Rohluna leh department hotute July 29, Pathiannia ṭhukhawm chuan, HSS pakuate leh lumpsum school dangte chu sorkar sum dinhmun enin, dinhmun sang zawkah hlankai theih a nih loh thu an lo tarlang tawh.

Minister-te chuan, sum awm dan azirin private school eng emaw zat chu lump sum grant pek an ni a, lump sum grant an dawn mekte chu tipung turin tun hma aṭang tawhin hmalak niin, sorkarah file a kal mek thu an sawi a; "Sorkar sum neihin a tlin tawk ang zela rualkhai taka hmalak a ngaih avangin, private school-te'n ad hoc grant-in-aid-a hlànkai an dilna chu tihhlawhtlinsak duh hle mah se, a theih rih loh a ni," an ti.

Minister pathumte leh depart­ment hotute ṭhukhawm hian khaw pakuaa kawngpui dan chu ṭha lo an tih avangin, mipui harsatna a thlen loh nan lump sum HSS pakua awmna district panga - Aizawl, Lunglei, Serchhip, Champhai leh Mamit district-ahte Cr.PC 144 puan an rel a; an thurel ang hian district pangaa magistrate-te chuan an district ṭheuha hman turin Cr.PC 144 chu July 29, Pathianni zan khan an puang a ni.

Magistrate-te'n Cr.PC 144 (mi panga aia tam punkhawm khapna) an puan chu kengkawh turin nimin khan khaw pakuaah hian magistrate leh police eng emaw zat an duty a; mipui leh police innawrna emaw, buaina leh harsatna lian tham emaw a thlen hriat a ni lo.