SSA leh RMSA-a thawkte hlawh atana Pek chhuah zat sorkar laipuiin a titlem

Sorkar laipui chuan Sarva Shiksha Abhiyan (SSA) leh Rashtriya Ma­dhyamik Shiksha Abhiyan (RMSA) hnuaia thawkte hlawh atana sum an pek theih zat chu India ram pumah a hrût rual a, tuna an hlawh aiin a tlem zawk.

SSA hotute hnen aṭanga Vanglaini thu dawn danin, sorkar laipui chuan SSA leh RMSA-a thawkte hlawh atan mi pakhat zelah thla khat atan Rs. 15,000 a tum thei dawn. Tun dinhmunah chuan SSA leh RMSA hnuaia thawkte hian Rs. 20,000 - 25,000 an hlawh hlawm a ni.

Sorkar laipuiin rua­hmanna a siam dan chuan, hlawh tur chu sorkar laipuiin mi pakhat tan Rs. 15,000 a tum ang a, chu aia tam state-in an pe duh emaw, a hmaa an pek zat an pe zel duh a nih chuan Rs. 15,000 bak zawng chu state sorkar tum tur a ni tawh dawn.

Mizoram sorkar chuan a hma anga hlawh pek a nih theihna atan Ministry of Human Resources Development (MHRD) hnenah ngenna an thlen a, a hlawhtlin leh hlawhtlin loh hriat a la ni lo.

New Delhi-ah MHRD-in Project Approval Board (PAB) meeting a koh ṭum pawhin Mizoram sor­kar official-te chuan a hma anga hlawh lak a nih theihna atana a ngai anga sum pe chhuak leh turin MHRD hotute an ngen a ni. PAB meeting minute a la chhuak lo a, a chhuah hunah SSA leh RMSA-a thawkte hlawh chu a ngai anga pek theih a nih dawn leh dawn loh hriat theih a ni ang.

Hetih lai hian, RMSA leh SSA-a thawkte hlawh tur hi eng emaw zat chu sorkar laipuiin a pe chhuak tawh a, mahse, a hma ang zat hlawh pek theih a nih loh avangin pek chhuah a la ni lo. School Education department chuan a hma anga hlawh pek a nih theihna atan sorkarah sum an dil belh mek a ni.