Zophaia Zofate Chawlhbûk sa ngei turin Sorkar kan phût - ZPM Vice Chairman
Zoram Peoples' Movement (ZPM) vice chairman Vanlalhlana chuan, Congress kaihhruai sorkarin Bairabi Zophai-ah Zofate Chawlhbûk sak ngei an intiam tih a sawi a, "An intiam ang ngeia chawlhbûk sa turin kan phût a ni," a ti.
Vanlalhlana hian nimin khan ZPM pisaa inkhawm thu sawiin, "Zophai hmunah hian Mizoram chief minister hmasa ber Pu Ch. Chhungate'n leilet an nei a, a nupuiin MZP hnenah Zofate Chawlhbûk sakna tur a pe a ni," a ti a; MZP-te'n chawlhbuk an sak chu Assam sorkarin sipai tira an tihchhiat thu a sawi.
MZP-te'n chawlhbûk sak an tum leh ṭumin Assam sorkarin sipai tam zawk an tirh thu sawiin Vanlalhlana chuan, "Mizo ṭhalaite'n hliam an tuar a, silai a puak hial a, MZP bungrua leh an hawh khawm eng emaw zat a chhia a ni. He thil thleng hian Mizo hnam min phuar khawm a, Mizoram hmun hrang hrang
aṭangin Zofate Chawlhbuk sa tura Bairabi pan inhuam an awm ṭeuh a ni," a ti.
ZPM Vice Chairman chuan, boruak a rih em avangin sorkar laipui a inrawlh tih sawiin, "Mizoram sorkar pawh a mangang a ni. Mizoram ṭhalai tam tak chawlhbûk sa tura thawh chhuah an hreh lo a, Cabinet mai hi ni lo, Congress Legislature Party (CLP) an ṭhukhawm a, Zophai hmunah Zofate Chawlhbuk sa ngei turin thutlukna an siam a ni," a ti a; CLP thutlukna chuan Mizo mipuite a tihlawm thu an sawi.
Vanlalhlana chuan, tun thlengin sorkarin Zofate Chawlhbuk an la sak lo thu sawiin, "MZP hian chawlhbûk sak ngei an tum tih a hriat a, innawr luih luihna a thlen lohna atan Congress sorkar hian an intiam ang ngeiin Zofate Chawlhbuk sa ngei rawh se," a ti.
Political party-te'n campaign-na atan sum sem an hmachhuan ṭhin tih sawiin Vanlalhlana chuan, "Congress an tling a, NLUP an sem ngei. Mahse, a kalphung a dik lo a, kan ram a rethei tual tual si. Hmasawnna thlen lo mah se, Congress-in an tlinpui si avangin MNF lamin cheng nuai thum sem an tlangaupui ve leh a ni," a ti a; sum sem chu ramin a ṭhatpui loh thu a sawi.