KHAWTHLIR
Halpuah khap sawiho
Central YMA office bearer-te chuan nimin khan Home minister R Lalzirliana a pisa-ah an kawm a, Krismas leh kumthar vuakveta halpuah leh halmawi khap a nih theihna atana hmalak dan tur leh Puja hunlai pawha halpuah leh halmawi tel loa hun hman a nih theih dan tur an sawiho. Hemi chungchang hi August, 2018 chhung ngeia sawiho leh nise, an ti.
E-Roll sawiho
Lawngtlai District Level Standing Committee for 2nd Special Summary Revision of Electoral Roll 2018 chu nimin khan Lawngtlai DC conference hall-ah an ṭhukhawm. Meeting hi chairman N Chakhai, district bawrhsapin a kaihruai a; kumin Assembly inthlanpui awm tura electoral roll chungchanga hmalakna tur hrang hrang an sawiho a ni.
Project endik
Champhai District MiMIR Committee chu nimin khan district bawrhsap Dr Naveen Aggarwal hoin DC conference hall-ah an ṭhukhawm a, an district-a khua/vengte'n MiMIR hnuaia project an thehluh endikin, project lut 19 aṭangin a ṭha zual 13 an thlang chhuak.
Candidate tur puan leh tum
PRISM party chuan Election Commission of India (ECI)-in political party-a a pawm champha, August 1, 2018-ah kumin Assembly inthlanpuia an candidate turte puan leh an tum. PRISM hian ECI-in election symbol atana PRISM party tana hman theih a chhawp chhuah 161 aṭangin parukah an thlifim tawh a; chungte chu - Baloon, talhtum, battery torch, khaidiat, lunghlu, lukhum leh tiang-te a ni.
Pawisa chawitir
Serchhipa Legal Metrology Enforcement staff-te chuan July 28-a Mizoram pawn aṭanga buhfai zuartu, a bag pawn lama a rih zawng inziak ang zat aia zang an zawrh avanga an mante chu nimin khan pawisa chawitirin an hrem a, buktling loa buhfai zuar tawh lo tura intiamkamna an ziahtir nghal.