LRS deptt. hna lak turah Thil dik lo a awm?

Mizo Students Union (MZU) chuan thuchhuah siamin, Land Revenue & Settlement department-a data entry operator (DEO) muster roll-a mi pariat lak turah personal interview result nghah a nih mek laiin, interview turin mi dang koh leh an ni tih an tarlang a; "Hei hi DPAR-in Recruitment Rules (RR) a siam kalh a ni," an ti.

MSU tarlan danin, Land Revenue & Settlement (LRS) department-a DEO tur hian July 9, 2018-ah personal interview tur mi 18 koh an ni a, interview result nghah a nih mek laiin, July 23-ah personal Interview nei turin mi dang paruk koh thar leh an ni.

LRS department thil tih danah thil dik lo a awm ngeia an hriat avangin a changtu minister R Romawia chu thil awmzia zawtfiah turin hmuh an tum a, mahse, minister R Romawia chuan hun a pek theih loh avangin MSU an lungawi lo hle tih an sawi a; "MR-a DEO atana mi parukte DPAR Recruitment Rules kalha personal interview tura koh tharte hi duhsakna uchuak tak vanga tlinga lak an nih chuan, MSU chuan a pawm thei dawn lo a, a ṭul angin a tawp thlengin kan dodal dawn," an ti.

MSU chuan, lump sum aided higher secondary school pakuate'n adhoc grant-in-aid-a hlan kai an phût vanga hun rei tak zirlaite'n zirna an chhunzawm thei lo leh first term exam thei loa an awm chu pawi an tih thu sawiin, zirlaite harsatna chu a rang lama chinfelsak turin sorkar thuneitute an beisei tih an sawi.

MZU chuan, NIT, Mizoram zirlaite'n an duh loh an zirtirtu, Dr Bijayananda Mohanty-a'n Mizoram a chhuahsan ngei theih nan a ṭul angin hma an lak zel dawn thu an tarlang bawk