Ni tin kan pung zel - BJP President

BJP, Mizoram Pradesh president Prof. JV Hluna chuan, BJP-in beihna nasa tak tâwk ṭhin mah se, ni tin an pung zel a, chawlhkar hmasaah pawh Lungleiah mi 196 an lawm lut niin a sawi.

Nimina Aizawla BJP pisaa inkhawmah thu sawiin JV Hluna chuan,"Beihna leh har­satna tam tak tâwk ṭhin mah ila, Pathianin kan hma min hruaisak zel a, ni tin mi thar min zawmtute an pung zel a ni," a ti.

Prof. JV Hluna chuan, zirlai tam takin zirtir­tu an neih loh vanga zirna chhunzawm thei loa an awm chu pawi a tih thu sawiin, "World class education min tiamtute'n heti taka education an ngaihsak lo hi a vanduaithlak hle a ni. Kan sorkar hrawn mek hian education hi a ngai pawimawh a nih tak tak chuan, NEDP-a cheng vbc. 100 tél an dah thei a nih chuan,ṭhalaite hmakhua atan hian sum an dah thei ngei tur a ni," a ti bawk.

Mizoram BJP thuchhuah chuan, Aizawl East-I MNF Block joint secretary Ricky Zonunsanga chu nimin khan BJP-ah an lawm lut niin an tarlang.