Beiseina siam turin kan pên chhuak - Wake Up Mizoram Chairman

Wake Up Mizoram hruaitute chuan July 29, 2018 khan Serchhip Times office-a thuthar thehdarhtute an kâwm a; an chairman C Lalrosanga chuan, party politics tui núin Mizo mipui a chiah nut nasat tawh avangin mipui an beidawng hle tih sawiin, "Vote thlak châk lo an pung zel a, beidawngte tan beiseina siam turin kan pên chhuak a ni," a ti.

C Lalrosanga chuan, politics dik inzirtirna Mizo mipuiin an la dawng tlem nia sawiin, "Party ruihchilhna te, induhsakna uchuakte hi kan politics hmuh chhun leh kan hriat thiam dan a ni a, chu bâwih ata Mizo mipui chhan chhuah a, Pathianin chhia leh ṭha hriatna thiang tak min pek hi hmang ngam a, neutral ngam tura mipui auh harh hi kan tum ber a ni," a ti a; party tih bik an nei lo tih a sawi.

Wake Up Mizoram vice chairman Rev. Lalzuithanga chuan, Mizoram chu Isua Chanchin Ṭha vanga ding chhuak leh tun dinhmun thleng thei a nih thu sawiin, "Tunah chuan party politics tenawm takin min chiah nasa ta lutuk a, a rethei an rethei tial tial a, a hausa an hausak belh thûr thûr a, heti ringawt chuan he ram hi rei tak a kal dawn lo. Mizoram hi cancer natna vei ang a ni tawh a, a damna hi development-ah a awm lo a, party politics emaw, education-ah emaw a awm lo; Isua Chanchin Ṭhaah chiah kan ram leh hnam damna a awm a ni,” a ti.

Rev. Lalzuithanga chuan, Mizoram chu tihdam ngai leh siamṭhat a ngai a nih thu sawiin, "Wake Up Mizoram hian non political movement hmangin kan ramah Pathian ṭih mi, mi ṭha, kohhran ngai pawimawh mi roreltu awmtir kan duh a, a ṭul chuan mipui candidate pawh siam kan tum," a ti. "Tunah hian MPF-ah Assembly constituency tina candidate siam tura ngenna kan thlen a, kan hlawhchham a nih pawhin mipui candidate siam a nih theih nan hma kan la zel ang," a ti bawk.