Lump sum school-te intiamna sawifiah
Lump sum grant-in-aid higher secondary school (HSS) awmna khuaa zirlai pawl, Joint SU chuan thuchhuah siamin, School Education department thuchhuahin lump sum school-te an inenkawl theih thu an intiam tih a tarlan chungchang an sawifiah a; an intiam laia an hmachhuan ber pakhat, ni 100 inhlawhna a mumal tawh loh avangin tunah chuan khawtlang tan enkawl a harsat tâk thu an tarlang.
Joint SU tarlan danin, school managing board-te chu, 'Kum lo kal zel tur atan he institution hi ṭha takin Managing Committee-in a enkawl thei ang em?' tia zawh a ni a, Managing Committee-te chuan an enkawl theih thuin an chháng a ni.
Joint SU chuan, managing board-te'n an sikulte chu kum 14 leh a aia tam an enkawl tawh hlawm thu sawiin, "Ram hmasawnna hian keini thingtlang mite hi min ṭhansan avangin khawpui lama tam tial tial pawisa hi thingtlang lamah chuan a váng tial tial thung. Kan chhuan ber ni 100 inhlawhna a mumal lo tial tial si a. Chuvangin, theih ang anga hun rei tak kan lo enkawl tawh hi sorkhar chak tak tan chuan chhâwk harah kan ngai lo a, kan beisei mek a ni," an ti.
The Mizoram Education (Establishment and Management of Private Higher Secondary School) Rules 2006-a Rule no. 5(3) chu lump sum HSS din hnua siam a ni tih sawiin, "He dan hi keini min phuar teltir ṭâlh duh a nih pawhin keini lamah chuan harsatna kan nei lo. Kan zirtirtute hian khawtlangin lawmman kan pek theih tâwkah an phun lo a, lawm takin kum tam kan kalpui tawh hlawm a ni," an ti a; zirtirtute chu an hlawhah an phunnawi lo niin an sawi.
Sorkarin a hmaa mite upgrade si lo a, tun hnaia khawtlang din sikul eng emaw zat lump sum grant-in-aid ah dah a tum tih sawiin Joint SU chuan, school upgradation system a buai phah dawna an ngaih thu an sawi a, "Kum kaw chhung school upgradation kalpui a nih tâk lohah chuan lumpsum leh adhoc grant-in-aid-ah kan inhnâwk khawm mek a, school upgradation hi engtia kalpui kalpui tur nge ni ta ang?" an ti.
Joint SU chuan, "Sorkar chak tak kan tih ṭhin, 7th. Pay pawh kalpui theitu leh world class education sawi vul chûk ṭhin hian keini sikul pakua lek basic pay leh DA 50%, sorkar hnathawk dang anga increment, etc. heti em ema a huphurh mai hi mak kan tiin hriatthiam har kan ti tak zet a ni," an ti a; kum kaw chhunga school upgration a kalpui dan enin, world class education an sawi nen a inperhsan hlea an ngaih thu an sawi bawk.