Hmeichhe inzuarte enkawlna project NGO kutah dah dawn

Mizoram State AIDS Control Society (MSACS) Executive Commit­tee chu nimin khan an chairman H Lalengmawia, Health secretary hoin Secretariat conference hall-ah an ṭhu a; Aizawl Municipal Corporation chhunga hmeichhe inzuar ṭhinte enkawlna project chu NGO pakhat kuta dah an rel.

MSACS Executive Committee meeting-ah hian HIV/AIDS darh zel tur vènna tichak lehzual turin district pasarihah NGO pasarih, targeted intervention leh link worker scheme project hnuaia rawih tura rawtte pawm a ni. Kum 2019-2020 chhunga hnathawh dan thlir lêt a ni a, kum 2020-21 chhunga MSACS hnathawh dan tur ruahman an pawm bawk.

Tun hmaa MSACS-in a neih ngai loh, HIV endikna damdawi pawimawhte dahṭhatna tur walk-in cooler pawh kum 2019 khan NACO-in a rawn pe a, hman theih tura buatsaih fel ṭep a ni tawh tih tarlan a ni.