Governor leh Chief Minister-te'n Krismas & kum thar chibai an bûk

Governor Hari Babu Kambhampati leh chief minister Zoramthanga te chuan nimin khan Krismas leh kum thar chibai bûkna thuchah tichhuakin, duhsakna an hlân. Governor chuan, hripui léng vanga mi harsa zawkte theihnghilh loa ṭanpui turin Mizoram mipui a chah.

Hari Babu Kambhampati chuan, Krismas chu Isua pianna hlim leh lawm taka lawm hun a nih thu sawiin, "Lei leh van inremna ní-ah hian remna leh muanna kan thupui ber ni se. Remna hi tunlai khawvel innghirnghona leh buaina kara kan mamawh ber a ni. Lal Isua khan mi dangte hmangaihna leh lainatna a zirtir tih hre thar leh ila, mi dangte nen inngaidam tawnin, thlamuang taka lên za i tum ang u," a ti.

Hmun tam takah mi dangte rem hlei thei loa inlâk hran tumna a thleng mek tih sawiin Larsap chuan, "Lal Isua’n min zirtir angin inpumkhatna leh inunaunate vawn nun tlat kan tum tur a ni. India ram inpumkhatna atan mi chi hrang hrangte zái khata luanho tih kan thupui ni reng ṭhin hi Mizorama chêng hnam pêng hrang hrang leh sakhaw hrang hrang vuantute tan pawh kan inpumkhatna atan a pawimawh em em a ni," a ti a; remna leh muanna a awm theih nan theihtawp chhuah tlan zel a ṭul thu a sawi.

CM Zoramthanga chuan, Covid-19 léngin Mizoram leh khawvel a tihbuai avangin duh leh tum anga Krismas leh kum thar lawm theih a ni lo chu pawi a tih thu sawiin, "Pathian remruatna leh rorelna a nih miau avangin hriatthiam dan zawng a, a aw leh a thusawi kan ngaihthlak thiam a ngai. Kristian ram leh amah ringtute ni mah ila, khawvel tawrh tura Pathian rorelna kan pumpelh thei bik lo," a ti.

Chief Minister chuan, Krismas leh kum thar thleng turah biak-ina inkhawm theih ni tawh mahse doctor-te thuràwn angin Pathian faka zâi a him ber rih lo tih sawiin, "Hlim taka Pathian faka chawimawina hla sak hi nuam kan tih leh kan châk ber pakhat chu a ni teh meuh mai. Amaherawhchu, a theih tâk si loah chuan Pathian chawimawina chi danga kan chawimawi a ṭul a, 'Ka nunin Lalpa a chawimawi e' kan tih a ṭul ta zawk a ni," a ti a; zaia Pathian chawimawi leh theih thuai a nih theih nan ṭawngṭai turin mipui a ngen.

Covid-19 avangin nunphung a danglam tih sawiin Zoramthanga chuan, "Ram hmasawnna chi hrang hrang leh development hna ruahman leh hmachhawp kan neihte pawh a châwl deuh ṭhuap mai a ni. Kum hnih dawn lai a liam hnuah chuan zawi zawiin hripui do dan leh inven dante kan thiam ve zel. Nunphung inher rem dan leh development pawhin tlem tlemin hma a sawn ve thei ta zel a ni," a ti a; kum tharah chuan Mizoramin eng emaw chen hmasawnna a neih a beisei tih a sawi.