Omicron a nih leh nih loh finfiah turin sample thawn

Integrated Disease Surveillance Program (ISDP) state nodal officer Dr Pachuau Lalmalsawma chuan, RT-PCR hmanga endiknaa Covid-19 positive mi pahnih swab sample chu Omicron vei an nih leh nih loh finfiah turin National Institute of Biomedical Genomics (NIBMG), Kolkata-ah thawn a nih thu a sawi.

Vanglaini palai zawhna chhangin Dr Pachuau Lalmalsawma chuan, ram páwn aṭanga Mizorama rawn haw zingah mi pahnih chu RT-PCR hmanga endiknaah an positive tih sawiin, "Mizo­ramah Omicron vei leh vei lo finfiah theih a nih loh avangin an sample chu NIBMG-ah thawn a ni a, result kan la dawng lo. Anni pahnih sample bak chu Omicron a nih leh nih loh finfiah tura sample thawn kan la nei lo," a ti.

Dr Pachuau Lalmalsawma chuan, Mizoramah Omicron a lên lohna turin theihtawp chhuahin an fimkhur a, ram páwn aṭanga rawn haw reng reng chu khung hran zel an nih thu a sawi bawk.