Kawlphetha leina tur sum PE dept.-in a thup ṭhen - JERC

Joint Electricity Regulatory Commission (JERC) for Manipur and Mizoram-in kumina kawlphetha chhit man (tariff) a bithliahna bu {Order-Petition (ARR&Tariff) No.1 of 2021} a tihchhuah a tarlan danin, Mizoram sorkarin kawlphetha leina tur sum Power & Electricity department hnena a pek aṭangin cheng vbc. 178.07 chu thup/thaibo a ni.

Kum 2018-19 leh 2019-20 chhunga P&E department hnena kawlphetha leina tur Mizoram sorkarin sum a pek cheng vbc. 283.57 chu an tarlang lo tih JERC hian a hmu chhuak a ni.

JERC report tarlan danin, PE department hian sorkarin cheng vbc. 115.95 chauh pe leh cheng vbc. 108.92-in a la indaih lo niin a insawi. Hetih lai hian, JERC chhût dan chuan, PE department hian sorkar aṭangin kawlphetha leina tur a hmuh chu kawlphetha leina man aiin cheng vbc. 174.65-in a tam zawk.

Sum hmuh chhuah cheng vbc. 178.07 aṭanga hmun thuma ṭhena hmun khat, cheng vbc.59.36 chu mipuiin kawlphetha an hman man tihtlâwmna atana hmang tur leh a la bâng cheng vbc. 118.71 chu a ṭul anga hman ṭangkai atana dah turin JERC chuan PE department a hriattir a ni.