Aizawl DC pisa kan chhan chhui tur Judicial enquiry din zawk turin ngen

ZPM party hruaitute chuan working president K Sapdanga hoin nimin khan December 17, 2021-a Aizawl Bawrhsap Pisapui kâng chhia an tlawh a; kângmei chhuah chhan chu magisterial enquiry mai ni lo, judicial enquiry dina chhui ṭha an tih thu an sawi.

ZPM hruaitute chuan, Mizo hnam ro hlu, kum 130 chuanga upa zan khat thil thua meivâpa a chang chu pawi an tih tak zet thu sawiin, "Document pawimawh tak tak, a hlutna sawi sèn loh, sumin a lei zawh loh khawpa hlu a kâng ral hi pawi kan ti tak zet," an ti a; sorkar pisa pawimawh tak tak, kângmei laka him lote enfiah a, thil pawi a thlen tawh lohna tura hma la turin Mizoram sorkar an ngen.

Bawrhsap Pisapui kan chhan zir chiangtu tur magisterial enquiry din a ni chu lawmawm an tih thu an sawi rualin ZPM hruaitute chuan, "Bawrhsap pisapui meuh kâng chungchanga Mizoram mipui tam berte duh dan nia lang chu magisterial enquiry mai ni loin, judicial enquiry ngei din a, zir chian ni zawk se kan duh tih a lang. Bawrhsap Pisapui kan chhan chhui chiang turin judicial enquiry dina hma la turin sorkar kan ngen a ni," an ti.

Aizawl Bawrhsap Pisapui kâng chhia ennaah hian MLA pathum - Vanlalhlana, VL Zaithanzama leh Lalchhuanthanga te pawh an tel a ni.