Sairang-Hmawngbuchhuah rél kawng siam chungchang LS MP-in a sawi

Lok Sabha MP C Lalrosanga chu nimin khan New Delhi-a DoNER Ministry Consultative Committee ṭhutkhawmah a tel a; Lawngtlai district-a Hmawngbuchhuah thleng rél kawng siam chungchang sawiin, survey neih tawh a nih avangin hmalak zui zel a ṭul thu a sawi.

MP C Lalrosanga chuan, km. 223-a thui tura chhût Sairang-Hmawngbuchhuah rél kawng siam tum chu Kolodyne Multi Modal Transit Transport Project (KMMTTP) nena inzawm thei tura ruahman a ni tih a sawi a; Mizoram tan a ṭangkai dawn tih sawiin, hma la chhunzawm turin DoNER hotute a ngen a ni.

DoNER minister G Kishan Reddy chuan, Prime Minister ṭhahnemngaihnain India hmarchhakah cheng vbc. 39,000 sênna tur rêl kawng siam nan hna hrang hrang thawh mek a nih thu a sawi a, "Rél kawng atana hmun 122-a lei verh mekah 27 verh zawh tawh a ni a, hmarchhakah motor kawngpui laih hna cheng vbc. 85,000 chuang senna tur thawh mek a ni bawk," a ti.

C Lalrosanga hian Mizorama khualzin hîp luhna tur ruangám tihchangtlun zel a ṭul thu te, mau hman ṭangkaina dap zui zel a ṭul thu te, tun sorkar kuma hmarchhak state-te tana ministry leh department 54-te sum ruahman 10%, Gross Budgetary support atana cheng vbc 68,000 chuang ruahman a ni chu lawmawm a tih thu te, ramri hrûlte ngaih pawimawh a ṭul thu te, telecom company-te'n ramri hrûlahte inbiakpawhna lam an tihphuisui a ṭul thute a sawi bawk.