NHM-a thawkte nawrh chhan sorkarin a mawhphurhna a hlen loh vangah puh

Mizoram Pradesh Youth Congress Committee (MPYCC) chuan thuchhuah siamin, NHM-a thawkte an nawrh chhan chu Mizoram sorkarin a mawhphurhna a hlen loh vang a nih thu leh an nawrh avanga Mizoram sorkarin MESMA a puan khum chu pawi an tih thu an tarlang.

MPYCC chuan, National Health Mission Employees Union, Mizoram (NEUM)-in chhan hrang hrang vangin sorkar nawr nan nawrh an huaihawt tih sawiin, "An nawrh avangin sorkarin MESMA puan a khum a, IPR minister Pu Lalruatkima phei chuan vauna anga ngaih theih thu hial chhâk chhuakin, anmahni vanga nunna chán an awm palh chuan an mawhphurhna a san tur thu leh an ai hial lâk a ngaih theih tur thu a sawi a ni," an ti.

Congress ṭhalaite chuan, "Mahni hnathawkte chanvo tur pek theih loh vanga sorkar a inhrosa ta mai hi pawi kan ti hle a ni. Sorkarin a tih tur leh mawhphurhna a hlen loh avanga thil pawi tamtak thlengah hian sorkarin mawh a phur," an ti a; Mizoram chu a mawhphurhna a hre tâwk em, tiin an zawt a ni.

RT-PCR laboratory siam belh theih loh vangin mipuiin harsatna an tâwk a, Aizawl páwn lam mi phaia zin ngaite hun leh tha, sum leh pai tam tak sêngin ZMC an pan a ngaih thute sawiin MPYCC chuan, "Aizawl páwn lamah covid dedicated hospital a din mai loh avanga hla tak tak aṭanga Covid-19 vei, ZMC panna lama kalkawnga boral tate leh ZMC panna kawnga nat zual phaha ZMC-a boral zui tate avang hian sorkarin mawhphurhna a la ngam dawn em?" an ti.

MPYCC zawhna dangte
 Khawvela lockdown rei ber avanga eizawnna tlachhe vek ta te, leiba rulh sên loh neia hun khirhkhân tâwk mekte hi sorkar hian a mawhphurhnaa lain, an harsatna sukiang turin zángnadawmna a ruahmansak thei
dawn em?
 Mipui mimir tan sorkarin electric bill a tipung chiam mai leh petrol leh diesel tax a tisang chiam maite hi a tihniam leh thei dawn em?
 Vawiin thlenga health care-a bill tángte hi mipui tan phurrit nasa tak a ni a, pawisa tihtànsak leh batsak pek vat hi sorkar mawhphurhna a ni tih a hria em? Bill a release duh loh avanga mipui channa leh tawrhna hi a compensate dawn em?
 Pension tawhte chhuahpui tur sum mi sang tél pawisa a hrènsak tihfel vat hi a mawhphurhna a ni tih a inhria em? Heng avanga harsatna naménlo an tawh mekah hian sorkarin a hranpain zangnadawmna a pe dawn em?