KHAWTHLIR

Thisen pe
MICE NSS volunteer-te chuan nimin khan Aizawl Civil Hospital Blood Bank-ah thisen unit 10 an pe a, petute mipa pakua leh hmeichhia pakhat an ni. Mimala a thlawna thisen pe mi 18 an awm bawk.

Governor-in pe
Governor Hari Babu Kambhampati chuan nimin khan Aizawl khawpui leh a chhehvela home/centre pasarihah Krismas pualin ei tur leh thilpek chi hrang hrang a pe.

Ráltlân tanpui
Aizawl Thunders (Aizawl Bullet Club) chuan December 17-18, 2021 chhung khan Christmas Charity Ride an nei a, North Vanlaiphai, Cherhlun leh Ngharchhip khuaa Myanmar ráltlânte hnenah pawisa, mutbu leh bungbel eng emaw zat an hlân. Aizawl Thunders hian kum 2005 aṭangin Krismas dawn apiangin charity ride an nei ṭhin a ni.

Go to the people
Lunglei DC Office chuan Good Governance Week (December 25) pualin nimin khan Hauruangah Lunglei district-a November thla tir aṭanga kalpui 'Go to the people’ project an buatsaih. 'Go to the people’ project hi mipuite sorkar scheme hrang hrang zirtirna, sorkara dilna an thehluhte a hmuna tihfelpuina, certificate siamsakna leh vei zawngte sorkara thlen theihna a ni.

YMA jubilee lawm
YMA, Thingsai Branch chuan nimin khan kum 50 a tlinna, golden jubilee an lawm a, jubilee lungphun an hawng. Lungphun hi Thingsaia YMA dintu leh president hmasa ber H Haumawia'n a hawng a ni. Thingsaiah hian YMA branch pahnih an awm a, member 1,000 vel an awm.

Lehkhabu tlangzarh
K Zothanmawia ziah 'Pathian leh kan ram tana ka tawn leh rah chin' tih lehkhabu chu nimin khan deputy chief minister Tawnluia'n a pisaah a tlangzarh. Tawnluia chuan, ṭhangtharte'n Mizo hnam tana rammúte inpekna an hlamchhiah a thiang lo tih a sawi.