Champhai District Joint NGO-te'n DC khawih che lo turin sorkar phût

Champhai District NGO Coordination Committee (Joint NGO) chuan thuchhuah siamin, December 17, 2021 zana Kelkang dáia kuhva rah man sa hâl a nih avang leh dan loa kuhva tawlh rûk dodal avanga Champhai bawrhsap Maria CT Zuali khawih che lo turin Mizoram sorkar an phût tih an puang.

Champhai district NGO-te chuan, dan kengkawhtu mimal dem leh dan bawhchhetute'n thiamthu sawi tum phêt emaw, thinrima Champhai DC Maria CT Zuali sêl ai chuan, Kristian Mizote'n ram dan an ngaih pawimawh a ṭul thu an sawi a, "Dan kengkawhtute dem aiin dan bawhchhetute zawk hi ram dan zaha khawsa tur an ni zawk tih hi kan ngaihdan a ni. He thil thleng avang hian Champhai DC hi khawih che lo turin sorkar kan phût a ni," an ti.

Myanmar aṭanga kuhva ro lak luhte chu dan loa lak luh a nih thu sawiin Champhai NGO-te chuan, "Indo-Myanmar Border Trade (Zokhawthar LCS) line-ah hian kuhva hi dan angin gate-a lak luh a ni lo," a ti a; sumdawngte'n an phurh theih dan zawngin kawng an dap a, kawngpui an zawh pawhin sum hmathehin bungrua an kalpui zawk tih an tarlang.

Champhai district NGO-te tarlan danin, border trade chu Indian Constitution Schedule VII ang chuan Ministry of Finance-a Central Board of Indirect Taxes & Customs hnuaiah Zokhawthar lei kaltlanga lak luh tur a ni.

Dan hnuaia lak luh a nih chuan GST Act, 2017 angin basic custom duty 100% chawi a ngai a, certificate of origin nei tan 40% chawi a ngai thung. Social welfare surcharge 10% pek a ngai bawk. Kuhva Rs 100 manah Rs 51.20 belhin, foreign trade value nen kg. khat Rs 351-a lak luh tur a ni.

Tariff thar berah chuan kg. khat Rs 600.26-in lak luh a ngai a, chu bakah chuan lirthei hman man leh muṭia rawih man hranpa a la awm. Kuhva lak luh danah Rs 50,000 chung lam manah e-way bill hmanga lak luh tur a ni, bill of entry anga lak luh chu man theih a ni lo.

Champhai District NGO-te chuan, Dan hmanga kuhva lak luh a nih loh avangin district administrator (DC)-in lak luh khapna thupek a chhuah tih tarlangin, "Dan loa kuhva la lutte chungah dan hmangin sorkar tana rinawm takin hma a la mai zawk a ni. Tunah hian dan angin kuhva lak luh ni ta se, normal trade a kal theih lohna tur awmin a lang lo," an ti.

Sumdawngte'n kuhva phurh an duh a nih chuan dan zâwm se an duh thu sawiin NGO-te chuan, "Kawng dik zawh se, tuna khawtlang nun chhiatna leh mihring nunphung khawloh phah a, chhun êngah pawh hna thawk ngam loa zan chuha sumdawnna kalpui a ṭul lo ang," an ti a; sorkar laipui leh state sorkarte'n a zar an zo ve vena tur leh sumdawngte tan pawha chhe lo tur kawng dap se tih chu an duh dan a nih thu an sawi bawk.