MJA-in Krismas pual thilpek an hlân

MJA General Headquarters chuan nimin khan Krismas pual thilpek a sem chhuak a, Aizawl Civil Hospital Poor Fund-ah leh de-addiction centre pahnihah a hlân.

MJA hian Krismas puala mite ṭanpuina turin an member-teah Charity Fund an khawn a, member-te leh mi ṭhahnemngai dangte'n Rs 71,450 an thawh khawm a ni. Charity Fund chu nimin khan Civil Hospital, Aizawl Poor Fund-ah Rs 41,450, Together in Christ Ministry din Rescue & Rehabilitation Centre, Melthum leh Faith Home, Chhingchhipah Rs 15,000 ve ve an pe a ni. Together in Christ Ministry home-ah mi 20 vel leh Faith Home-ah mi 13 an awm mek.

Aizawl Civil Hospital hnena thilpek hlanna inkhawmah MJA president Zonunsanga Khiangte chuan, Civil Hospital chu damdawi-in chhuanawm tak a nih thu sawiin, "Medical lama zirlai eng emaw zat a zirtir chhuah tawh te, ISO certificate a nei tluang zel theite hi thawktute hnathawh ṭhatzia tilangtu a ni," a ti.

Civil Hospital medical superin­tedent Dr Lalhmuchhuaka chuan, an damdawi-in chu mi náwlpui kalna a nih thu sawiin, "Aizawla damdawi-in pantu ngah ber, work load sang ber a ni a, hei vang hian theihtawp kan chhuah chungin dài pelh leh zauh kan nei ṭhin a, kan infuih ve mawlh mawlh reng a, a bikin emergency ward kan infuih nasa hle," a ti a, venpui zel an ngaih thu a sawi.