Covid-19 vei hmuh thar 5.01% chiah a ni tawh
December 21, Thawhlehni khan Mizoramah Covid-19 vei mi 197 hmuh chhuah a ni a, swab sample endik aṭangin 5.01% chiah a ni. Nimin khan hripui vei dam tawh mi 238 chhuahtir an ni a, hripui vangin mi pahnih an thi.
Covid-19 vei hmuh thar mi 197-te chu mipa 93 leh hmeichhia 104 an ni a; ZMC laboratory-a hmuh chhuah 27, TrueNAT hmanga hmuh 24 leh RAT hmanga hmuh 146 niin, FIA hmanga endik zingah hripui vei an awm lo.
IDSP record angin, Mizoramah Covid-19 vei 1,39,902 hmuh chhuah a ni tawh a, mipa 67,472 leh hmeichhia 72,430 an ni. Nimin tlai dar 5 thleng khan mi 1,37,761 (98.45%) chhuahtir an ni tawh a, mi 535 (0.38%) thi tawhin, enkawl mek mi 1,606 (1.17%) an awm.
December 21, Thawhlehnia Covid-19 vei hmuh thar mi 197 zingah symptom nei mi 98 an awm a, mi 99 erawh chu symptom nei lo an ni thung. Thawhlehnia swab sample endikah positivity percentage 10% aia a sanna district pahnih chiah a awm a, Khawzawl district-ah 11.06% leh Champhai district-ah 10.71%-te a ni, Kolasib district-ah 0.39% chiah a ni thung.
Kum 2011 chhiarpui aṭanga chhûtin, Mizorama Covid-19 vei hmuh tawh 1,39,902 chu mi 1,000 zelah hripui vei mi 127 an awm ang a ni a; mi 1,00,000 zela Covid-19 vangin mi 48 an thi tawh ang a ni tih sorkar thuchhuakin a tarlang.
IDSP tarlan danin, nimin tlai dar 5 thleng khan hripui vei dam tawh mi 238 chhuahtir an ni a; district tina chhuak zat chu - Aizawlah mi 119, Khawzawlah 53, Hnahthialah 17, Lungleiah 14, Mamitah 13, Serchhipah pakua, Champhaiah pasarih, Kolasib-ah leh Saitualah pakhat an ni.
Mizorama swab sample endik tawh zawng zawngah RT-PCR hmanga endik zat percentage ni tin a tlahniam hret hret zel a, RAT hmanga endik zat a pung zel thung. December 21, 2021 thlenga swab sample endik tawh 14,89,450 aṭanga RT-PCR hmanga endik zat percentage chu 22.10 a ni a, RAT hmanga endik zat chu 72.03% a tling.
