Champhai DC laka FIR thehluttu Police-in thu an la zawtfiah lo

Kelkang daia December 18, 2021 zan dar 8 vela kuhva man sa hâl a nih avanga Champhai DC Maria CT Zuali laka FIR thehluh chungchangah Champhai Police Station-ah thubuai ziah luh nghal ni mah se, FIR thehluttu Lalhruaitluangi, Chaltlang Lily Veng, Aizawl chu nimin thleng khan police-te'n thu an la zawtfiah lo.

Tarlan tawh angin, kuhva rah tawlh rûk nia hriat truck pali phur chu December 17, 2021 (Inrinni) zan dar 8 vel khan man a ni a, truck panga erawh chu man hman lohin an tlânchhe thung. Kuhva hâl a nih avang hian a neitu nia inchhál Lalhruaitluangi chuan Champhai PS-ah December 19, 2021 khan FIR a thehlut a ni.

Bawrsap laka FIR a luh angin Champhai PS-ah IPC Section 435, 427 leh 341 hmangin thubuai ziah luh nghal a ni. Hetih lai hian police-te chuan FIR thehluttu Lalhruaitluangi chu nimin thleng khan thu an la zawtfiah lo tih, Champhai PS-a officer-in-charge leh investigating officer Vanlalthanga chuan a sawi.

Champhai PS OC chuan, thuhretu (witness) thenkhatin Krismas chawlh an hman tawh avangin statement lak a la awm mumal lo tih a sawi a; hetih lai hian, Kelkang VC-te chu thu zawhfiah tawh an nih thu a sawi thung.

Vanlalthanga chuan, FIR thehluttuin e-way bill, GST registration leh tax invoice a neihte chu dan ang taka neih a ni em tihte chhui a ni dawn tih a sawi bawk.

Case IO chuan, Champhai DC chhui zui turin prosecution sanction an la dil lo tih a sawi a; chhui turin sorkar phalna, prosecution sanction lâk a ngai nia thu dawn a ni.