Pawl hrang hrangin Champhai DC thlavâng an hauh

December 18, 2021 zanah Kelkang dáia kuhva man sa hâl chungchangah hriat theih chinah pawl 15-in kuhva mantu Champhai district magistrate Maria CT Zuali thlavâng hauhna thuchhuah (press release/statement) an chhuah tawh.

MCS Pensioners' Union chuan nimin khan thuchhuah siamin, dan loa Myanmar atanga kuhva rah tawlh ruk, man leh hâl chungchanga an MCS pui Maria CT Zuali, Champhai DC hmalakna chu tha an tih thu leh an thlàwp thu an puang a, "Eng harsatna pawh tâwk se, kan thláwp zel ang," an ti.

Pawl hrang hrangte press release hi a tlangpuiin Champhai DC thlavâng hauhna leh dan loa kuhva tawlh rûk titawp tura a hmalakna thlâwpna a ni hlawm a; dan loa sumdawng (smuggler)-in dan anga hma la tura FIR a thehlut ngam chu mak an tih thu an tarlang hlawm bawk.

YMA Sub-Hqrs, Champhai erawh chuan press release n siam dan a danglam hlek a; kuhva tawlh rûk demna leh Champhai DC thlàwpna thu ni loin, Champhai DC leh sumdawngte inkara inhmuh thiam lohna awm pawi an tih thu leh tun hnuah thleng tawh lo tura an duhna thu a ni thung.

ZPM party chuan thuchhuah siam mai duh tâwk loin, press conference an nei thung a, kuhvaa sumdawnnaah dan loa thil titute hrem an phût a ni.

Kuhva tawlh rûk man chungchanga Press release siam tawh pawlte:

1. Champhai Ṭhalai Pawl

2. Champhai Officers' Club

3. MZP Hqrs, Champhai

4. YMA Sub-Hqrs, Champhai

5. Champhai District NGO Coordination Committee

6. MHIP Sub-Hqrs, Champhai

7. Kawrthah South Kuhva Chingtute Society

8. Lunglei Ṭhalai Pawl

9. Serchhip Ṭhalai Pawl

10. Hnahthial Ṭhalai Pawl

11. Vairengte Ṭhalai Pawl

12. MCS Pensioners' Union

13. ZPM party (press conference)

14. ZPM Ṭhalai

15. BJP, Mizoram Mahila Morcha