HM-in khapna thupek thláwp turin mipui a sáwm

Home minister Lalchamliana chuan nimin khan Mizoram mipuite Krismas leh kum thar chibai bûkna thuchah a tichhuak a; zu, ruihhlo, hâlpuah, halmawi, meithallawn leh naupang silai a mu kap chhuak theite sorkarin a khapna thláwp tlat turin mipui a sáwm.

Lalchamliana chuan, Covid-19 donaa Health department, LTF/VTF leh tlawmngai pawl hrang hrang hmalaknaah lawmthu a sawi a, "Kan state ramri buaina avanga mahni in lum thlahlel thei loa venhim hna leh ram humhalhna hna chi hrang hrang thawka pên chhuakte Krismas leh kum thar chibai ka bûk a che u. Police chauh ni loin pawl hrang hrang leh mimal tam takin thilpek leh mahni pên chhuakin ram hmangaihna in lantir a, in inpekna avanga kan thlen chin zelah hian Mizoram mipui kan fak tak meuh a ni," a ti.

Krismas leh kum thar hlim leh lawm taka hmang ṭheuh turin Mizoram mipuite duhsakna hlanin Home Minister chuan, "Kan hlimna leh lawmna hian kan chhehvela mite thleng pha ṭheuh se la. Ṭhenawm khawveng nen inremin, mahni chhungkua ṭheuhah hlim taka hmangin dikna ngai pawimawh ṭheuh ang u," a ti bawk.