KHAWTHLIR

Dawrpui Local Task Force chuan nimin khan containment zone ni mek Dinthar veng hnenah chhungkaw ei tur mamawh chi hrang hrang - dailuah ip 8, buhfai ip 6, artui báwm 5, tél báwm lian 7, nutrela fûn 309 leh alu ip 5 an hlan. Salvation Army pawhin Dinthar hnenah hian nimin khan buhfai, tél, chì, chini, sahbawn leh dailuah ṭhahnem tak an pe bawk. Dinthar vengah hian Covid-19 vei mi 84 hmuh a ni tawh a, chu'ng zinga mi 69 chu enkawl mek an ni. Dinthar LTF chuan thilpek petute chungah lawmthu an sawi.

Minister of state Robert Romawia Royte chuan nimin khan a department chan hnuaia hmalakna hrang hrangte a tlawh a, hna thawh dan a enfiah. Robert Romawia Royte hian 1st MAP parade ground leh Lengpui khelmuala phùl lem phahna tura hna thawh mekte leh Rawpuichhipa Tourism department-in Swadesh Darshan-2 (SD2) hnuaia hna chi hrang hrang 19 an thawh mekte a tlawh a; Sairang Dinthara MFA khelmuala phùl lem phahna tur a tlawh bawk.

Mangjangam Touthang, IIS chuan nimin khan Doordarshan Kendra (DDK), Aizawlah director hna a zawm. He hna a zawm hma hian Mangjangam Touthang hian News Service Division (NSD), AIR, New Delhi-ah director a lo ni tawh a ni.

November 11, 2020 zan dar 6 vel aṭanga Lailapur, Assam-a lirthei dan tihtàwp a nih hnuah harsatna a awm zui lo. Vairengte aṭanga thu dawn danin, lirtheite chu dan pangngai angin Mizoramah an lut chhunzawm char char tawh a ni.

Covid-19 vei State Referral Hospital ICU-a enkawl mi paruk zinga pakhat chu nimin khan ward-ah sawn chhuah a ni a, ICU-ah mi panga an awm mek. SRH-ZMC Bulletin tarlan danin, ICU-a awm mek mi panga zinga pali chu ventilator nen enkawl an ni a, pakhat dang chu oxygen pek mek a ni.