Aizawlah urlâwk zan a rálmuang

Nizan, Krismas urlâwk zanah khan Aizawl khawpui leh district khawpuite a rálmuang a, zanlai vel thleng kha chuan buaina, harsatna leh chetsualna lian tham thleng hriat a ni lo.

Aizawla zan curfew kengkawh turin police-te an duty ṭha hle a, Aizawl SP mawhphurhna la mektu Rodingliana Chawngthu, Traffic SP chuan, zan dar 9 atanga curfew kalpui chu khauh taka an kenkawh dawn thu leh hmun hrang hrangah police duty an indah dawn thu a lo sawi tawh a ni.

Aizawl khawpui chhung hmun hrang hrangah zan curfew hmain lirthei chhuakvâk tam mah se, curfew tan hnuah erawh chuan tlangdung kawngpui leh kâwn lûn laiahte lirthei veivâk uluk takin police-in an endik a, lirthei leh mihring veivâk an tam lo a ni.