Lengpuiah motorsports racing track siam a ni dawn

Sports & Youth Services minister Robert Romawia Royte chuan, REC Foundation-in an CSR fund atangin Lengpui rama motosports racing track siamna atan Mizoram sorkar hnenah cheng vbc. 10 a pe dawn tih a tarlang.

SYS Minister hian REC Foundation-in cheng vbc. 10 Mizoram sorkara pek a tum thu hi social media kaltlangin a tarlang a, "Sanjay Malhotra, IAS, Chairman, REC leh a thawhpuite chungah thinlung takin lawmthu ka sawi a. Kan Chief Minister Pu Zoramthanga pawhin he project atana state sorkar tum ve tur (counterpart funding) ruahman min tiam avangin thinlung takin lawmthu ka sawi bawk e," a ti.

Robert Romawia Royte chuan, Mizoram sorkarin infiamna kawng chi hrang hrangah infiammite tan theihtawp a chhuah zel dawn tih a tarlang bawk.

Zawhna chhangin Sports Minister chuan, motoraports racing track siamna tur sum cheng nuai 1,000 zinga nuai 750 chu REC Foundation pek tur a nih thu leh nuai 250 dang chu Mizoram sorkarin a ngaihtuah tur a nih thu a sawi.