Urlâwk zana curfew bawhchhiate sum chawi zat Rs 97,700

Krismas urlâwk zan, December 24, Zirtawpni zan khan Aizawl khawpuian curfew bawhchhia man eng emaw zat an awm a, chung mite sum chawi belh khawm chu Rs 97,700 a tling.

Aizawl SP mawhphurhna la mektu Rodingliana Chawngthu, Traffic SP chuan Vanglaini palai zawhna chhangin, urlâwk zanah Aizawl khawpuiah curfew bawhchhiaa chhuakvâk eng emaw zat an awm thu leh curfew bawhchhiate sum chawitir zat belh khawm chu Rs 97,700 a nih thu a sawi.

Rodingliana Chawngthu chuan, curfew bawhchhia leh thupek zawm loh vanga man mi eng emaw zat awm mah se, Aizawl khawpuiah buaina leh harsatna lian tham thleng hriat tur a awm loh thu a sawi bawk.

Tarlan tawh angin, Traffic SP hian December 24 chu Krismas urlâwk zan ni mah se, sorkarin zan curfew a la kalpui avangin curfew chu khauh takin police-te'n an kenkawh dawn thu a lo sawi tawh a; Aizawl khawpui chhunga kawngpui leh kâwn remchang hrang hrangah police-te an duty a ni.