Hripui vei enkawl mek tam lamah Mizoram 9-na a ni

Sorkar laipuiin nimin zing dar 8-a India ram Covid-19 dinhmun a tarlan danin, Mizoram chu India ram state/UT 36 zingah hripui vei enkawl mek (active case) tam lamah pakuana a ni a, hripui vei hmuh tawh aṭanga chhûta hripui vei enkawl mek zat (active case percentage)-ah a sang ber a ni mek.

Sorkar laipui data-a a lan danin, Kerala chu hripui vei enkawl mek tamna ber a ni a; Kerala-a hripui vei hmuh tawh 52,33,298 zinga mi 46,318 (0.89%) thi tawhin, enkawl mek mi 25,180 (0.48%) an la awm.

Covid-19 vei tawh zat aṭanga chhûta hripui vei enkawl mek tam lamah Mizoram chu pakhatna a la ni chhunzawm zel a; nimin zing dar 8 thleng khan Mizoramah hripui vei 1,40,492 hmuh chhuah tawh zingah enkawl mek mi 1,509 awmin, 1.07% a ni.

India ram state/UT 36 zingah Mizoram chu state pakhata hripui vei enkawl mek 1% aia sang awmna awmchhun a ni a; Mizoram hnaih bertu Ladakh chu 0.99% a ni. India rama mihring tam lama pathumna Bihar state chu hripui vei hmuh chhuah tawh aṭanga enkawl mek tlemna ber (0.01%) a ni thung.