Mizoramah Omicron la hmu lo

Tun hnaia India ram pawn aṭanga Mizorama haw zinga Covid-19 vei hmuh chhuah mi pahnih chu Kolkata-a enfiah nawn a nih hnuah Covid-19 chi thar Omicron a ni lo tih finfiah a ni.

Covid-19 chi thar Omicron chu khawvel ram dang leh India ramah hmuh chhuah belh zel a nih avangin tun hnaia ram dang aṭanga rawn haw mi pahnih chu Lengpui Airport-a RAT hmanga endiknaah Covid-19 positive an nih avangin an hripui kai chu Omicron a nih leh nih loh finfiah turin National Institute of Biomedical Genomics, Kolkata-ah thawn a ni a; tun hnai khan result dawn niin, Omicron an kai lo tih finfiah a ni.

IDSP state nodal officer Dr Pachuau Lalmalsawma chuan, ram pawn aṭanga rawn haw mi pahnihte sample NIBGM-a an thawn tawhte bâk chu thawn belh an la nei lo tih December 22, 2021 khan a lo sawi tawh a ni.

Dr Pachuau Lalmalsawma chuan, Mizoramah Omicron a lèn lohna turin sorkarin theihtawp a chhuah thu leh, ram pawn aṭanga rawn hawte chu inkhung hran zel tur a nih thu a sawi.