Covid-19 vangin mi 539 thi tawh - 82% chu natna dang nei tel an ni

Nimin khan Covid-19 vangin mi pahnih an thi a, December 25, Inrinni khan mi pakhat a thi bawk. Nizan dar 11 thleng khan Mizoramah Covid-19 vangin mi 539 an thi tawh.

Hripui vei enkawl lai Kawlkima (88), Samtlang, Aizawl district chu December 25, Krismas ni zan 9:15PM khan State Referral Hospital-ah a thi. Covid-19 vei a ni tih December 22 khan hmuh chhuah niin, SRH-ah enkawl nghal a ni a, natna dang nei tel a ni.

Nimin tlai dar 4:35 khan FC Johana (58), Tuipang chu State Refferal Hospital-ah a thi a, natna dang nei tel a ni. Covid-19 vei tih a ni tih December 11 khan hmuh chhuah a ni a, December 14 khan SRH-ah dah luh a ni tih sorkar thuchhuakin a tarlang.

K Lianmanga (61), Sangau pawh nizan dar 6:30 khan hripui vangin a thi a, Covid-19 positive a ni tih December 19 khan finfiah a ni.

Sorkar thuchhuah tarlan danin, Mizorama Covid-19 vanga thi 539 zinga 442 (82%) chu natna dang nei tel (co-morbidity) an ni.