Champhai DC laka thubuai ziah luh tihtawp thuai MCSA-in an beisei

Mizoram Civil Service Association (MCSA) chuan thuchhuah siamin, an member Maria CT Zuali, DC, Champhai-in sorkar thupek tihlawhtling tura hma a lakna kaihhnawihah a laka FIR thehluh a ni leh rang taka thubuai ziah luh a ni chu district administration leh civil service tihzahawm lohna leh hnuaichhiah tumnaa an ngaih thu leh thubuai chu tihtawp thuai a nih an beisei thu an tarlang.

Nimin December 27-a MCSA thuchhuah chuan, "Kan member Maria CT Zuali, deputy commissioner/district magistrate, Champhai district-in central leh state sorkar thupek pawimawh tak tihlawhtling tura tun hnaia a hmalakna kaihhnawihah tute'n emaw Champhai Police Station-ah complaint an thehlut a, rang taka case register a ni ta mai hi thil theng khát tak niin, democratic institution/district administration leh civil service tihzahawm lohna leh hnuaichhiah tumna ni thei hialin kan ngai a ni," a ti.

Mipui rorelna hnuaiah inrelbawlna dik, felfai leh tha a awm a, mipui zalenna leh chanvo dik tak a awm zel theih nan mipui aiawhte leh civil administration kengkawhtute zahawmna vawng him zel tura hmalak an tum thu sawiin MCSA chuan, "Law enforcement agency (dan kengkawhtu)-te'n mipui an rahbeh a, dan bawhchhetu emaw, dan zawm lotute nena an inthlun zawm mai loh nan leh mipui rorelna an hnuaichhiah mai loh nan hma kan la zel dawn a. Champhai DC/DM laka FIR/case register tawh pawh hi tihtawp thuai a nih kan beisei," an ti a; case titawp loa kalpui zel a nih chuan an kalpui zel dan ngun taka an thlir zui dawn thu an tarlang.

MCSA chuan, "Ram dan hnuaia mipui himna emaw, tanghma ngaia district magistrate-in thupek a chhuah reng reng hi a bawhzuitu tur district level-a law enforcement agency-te hian theihtawp chhuaha bawhzuiin, thupek dang ngaichang loin, district magistrate thu leh hla ngaichang tawh thin se, tih chu MCSA duh dan a ni," an ti bawk.