Lungleia RT-PCR lab. bun thar hawng dawn

World Health Organisation (WHO)-in cheng nuai 400 chuang man Covid-19 swab sample endikna hmanrua Mizoram tan nimin December 28 khan an hlàn a, Health minister Dr R Lalthangliana’n a pisaah a dawng. Minister chuan, Lungleia RT-PCR laboratory bun thar chu December 30, Ningani hian hawn a ni dawn tih a sawi.

WHO-in nimina swab sample test kit Mizoram hnena an hlan hi South Korea siam Rapid Antigen Test kit 3,60,000 leh RT-PCR test kit 1,80,000 a ni a; WHO aiawhin surveilance medical officer Dr Lalhlimpuii'n a hlàn.

Bungraw inhlannaah hian Dr R Lalthangliana chuan, Lunglei Zotlanga Tourist Lodge-a RT-PCR laboratory bun thar chu December 30, naktuk hian hawn a nih dawn thu a sawi a ni.

Health Minister chuan, July 2021 khan WHO-in Mizoram tan oxygen concentrator eng emaw zat an pe tawh tih sawiin, "Hetih hun lai hi Mizorama COVID-19 vei kan tam vanglai tak a ni bawk nen, kan sum dinhmunte thlirin rilru a hah em em a, tlàwm leh zah pawh dáwn loin kan mamawh dangte ka lo thlen ve ringawt mai a, a hun takah WHO kaltlangin ṭanpuina kan dawng hi a lawmawm tak zet a ni," a ti.

Kum hnih dawn hripui a lèn chhungin India ram pawn, ram chhung leh Mizoram chhung atangin tanpuina chhiar sen loh an dawn tawh thu sawiin R Lalthangliana chuan, "Ṭanpuina kan dawnte hi kan chhinchhiah vek a, a bik takin RT-PCR test kit leh RNA extractor hi a toin a hautak em em a, ICMR-in a thlawna min pek tawh zawng zawng hi cheng vaibelchhe 20 chuang hù a ni tawh," a ti a; Mizoram hmangaihtu hmun hrang hranga mite avangin an vanneih thu a sawi.

Health secretary R Lalramnghaka pawhin thu sawiin, COVID-19 chi thar Omicron a chhuah avangin sorkar laipuiin state leh UT sorkarte vawi duai lo lehkha a thawn tawh tih a sawi a, "Sample test zat hi nasa taka tipung turin min rawn nawr mek a, kan dinhmun thlirin sample test kit lei hi a hautak tak zet a, mamawh belhna a sang lehzual bawk. Hetih lai taka WHO an rawn lang hi anmahni kaltlangin Pathian a che a ni tih a lang," a ti.

Dr Lalhlimpuii, Mizoram hnenah PPE 5,000 an pek leh dawn thu a sawi bawk.