Aizawl DC-in mipui fimkhur turin chah

Aizawl DC Dr Lalhriatzuali Ralte chuan nimin khan hunpui hman mekah Covid-19 hripui laka fimkhur turin Aizawl district mipui a chah a, curfew hmaa in peihfel hman turin dawrkai leh pawnchhuakte a hriattir.

Aizawl Bawrhsap chuan virus chi thar Omicron a rawn hnai leh mek tih a sawi a,"Hetiang dinhmuna kan awm lai hian fimkhur tak leh inthlahdah loa mipui kan awm a ngai," a ti a, inkaihhruaina leh thupekte ṭha taka zawm turin mipui a chah.

Aizawl DC thuchhuah

1. AMC area chhungah zan dar 9 leh zing dar 4 inkarah pawnchhuah khap a ni a, dawrkaite leh pawnchhuakte pawh zan dar 9 a rik hmain inpeihfel hman tur a ni.

2. Curfew hun chhunga tihtur insiam chawpa pawnchhuah dil ngaia awm lo turin mitin kan inngen a, hun leh programme kan ruahmante pawh zan dar 9 rik hmaa inpeihfel hman ngei turin duan ṭhin nise.

3. Mipuite’n hnathawhna hmun hrang hrang leh chetvelnaah hmaituamna vuah reng tur a ni.

4. Loh theih loh thilah lo chuan pawnchhuah leh inlenpawh loh tur a ni a, building khata in hrang luahte pawh intlawhpawh loh tur a ni.