Health Minister in Lungleiah RT-PCR Laboratory hawng

Health & Family Welfare (HFW) minister Dr R Lalthangliana chuan nimin khan Lunglei Zotlanga Old Tourist Lodge building-ah Makeshift RT-PCR Laboratory a hawng.

Dr R Lalthangliana chuan RT-PCR Laboratory hawn tak chu Mizoram chhimlam district-te tan hmasawnna mellung pawimawh tak a nih thu a sawi a,"He laboratory ti hlawhtling tura theihtawp chhuahtu Lunglei district MLA-te, HFW department, officials dangte leh an hmunhma phal taka hman tirtu Tourism department chungah ka lawm hle. Civil Hospital Lunglei compound chhungah 'Laboratory Block’ changtlung tak ruahman mek a ni bawk," a ti a, Thermo Fisher 7500 RT-PCR khawl donate tu Thorang bialtu MLA Zodintluanga leh NGO Coordination Committee member zawng zawngte chungah a lawmthu a sawi bawk.

Lunglei medical superintendent Dr SR Ngurchamliana chuan ‘India COVID-19 Emergency Response & Health System Preparedness Package: Phase-II (ECRP-II package)’ project kaltlangin cheng nuai 30 dawn a ni tih a sawi a,"RT-PCR Laboratory mamawh bungrua leh thil hrang hrang lei nan tun dinhmunah cheng nuai 23.89 hman a ni tawh a, Ministry of HFW in inkaihhruaina a siam angin ECRP-II hmalakna hnuaia laboratory mamawh bungrua leh hmanrua tam zawkte hi Government e-Market place (GeM) portal kaltlanga lei niin hmanraw pali atan MoHFW phalnain GeM kaltlang loa lei an ni. Laboratory-a thawk tur staff parukte chu Viral Research and Diagnostic Laboratory (VRDL), ZMC-ah an training tawh," a ti a; hmanrua lei tawh te chu vortex, refrigerated centrifuge, deep freezer -80 C, deep freezer -20 C pahnih, domestic refrigerator, drybath, plate shaker, -20 mini cooler box, UPS 10KVA, desktop computer & lazer printer, hot air oven, incubator, biosafety cabinet pahnih, spinwin microcentrifuge, autoclave pahnih, pipette full set with pipette holder pahnih leh furniture-te an ni.

He huna tarlan danin, December 10, 2021 khan Thermo Fisher 7500 RT-PCR khawl hi Service Engineer hoin ZMC Microbiology department HoD Dr Swagnik Roy, HoD te nen hlawhtling taka bun (installation) leh en chhin (trial run) neih a ni a; Old Tourist Lodge building-a RT-PCR Laboratory bun tur hian Medical & Public Health (departmental minor work during 2021-22) kaltlangin a building hmunhma thawmthat nan cheng nuai 66.65 sen niin ‘India COVID-19 Emergency Response & Health System Preparedness Package: Phase-II (ECRP-II package)’ hnuaia cheng nuai 30 dawn atangin RT-PCR Laboratory mamawh bungrua leh thil hrang hrang leina atan cheng nuai 23.89 hman a ni tawh.

Hna hi September 22, 2021-ah bultan niin November 21, 2021-a zawh fel tura tih chu October 28, 2021-ah zawhfel a ni. Laboratory hi chhawng hnih niin a zau zawng sq.m 332 niin pindan 14 – sample receiving room, extraction room, master mix room, PCR Room, Doffing area, Donning area, DEO room, Autoclave room, store rooms, doctor & staff room, wash room, kitchen, bathroom leh toilet-te buatsaih a ni. Civil work hrang hrang bakah electrification, tui supply leh tui chhe paih chhuahna leh diesel generator shed-te siam anih bakah 50 KVA diesel generator leh AC khawl paruk bun a ni bawk.

Lungleia RT-PCR Lab. hawnnaah hian MLA pathum Lawmawma Tochhawng, Dr K Pachhunga leh Dr Vanlaltanpuia bakah HFW principal director Dr F Lallianhlira, NGO Coordination Committee hruaitute leh Lunglei district official-te an tel.