Champhai DC hmalakna thlawp

Mission Veng Branch YMA chuan thuchhuah siamin, an member Maria CT Zuali, Champhai DC chu ram leh hnam tana a hmalaknaah an thlawp tlat thu an tarlang.

Mission Veng YMA chuan Maria CT Zuali chuan a hnathawhna lamah ram leh hnam hmakhua ngaiin, dan ang loa kuhva tawlh chungchangah ṭhahnem ngai leh huaisen takin hma a la nia tarlangin, "Kan chhuang a, ṭha kan tiin kan thlawp tlat a ni. A hmalakna do zawnga dan ang loa sumdawng laka harsatna a tawk hi mak kan tiin kan hrethiam lo hle. Harsatna siamtu hi kan dem tak zet a ni," an ti.

Samthang khawtlang VC leh NGO hruaitute intelkhawm Joint Committee pawhin thuchhuah siamin, Champhai DC Maria CT Zuali hmalakna an thlawp thu leh a laka FIR thehluttu an dem thu an tarlang a,"Myanmar aṭanga Mizorama dan loa Kuhva an rawn phurh luh hi Samthang ram paltlang kan remti lo," an ti.

Samthang Joint Committee chuan, dan loa Kuhva lak luh thlen chin apiangah buaina a tam tih an tarlang a,"Kuhva phenah hian Mizo hnamnun khawih pawi thei thildang a tlakzeh kan ring. Kumkhat dawn kalta aṭanga Champhai district bawrhsap Pi Maria CT Zuali'n dan loa Mizorama Kuhva tawlhluh chungchanga khapna thupek a chhuah avangin kan chhuang tak zet a, kan thlawp tlat a ni. Dan loa sumdawngtuin dan anga hmalatu Champhai DC Pi Maria CT Zuali laka FIR a thehlut ngam hi kan dem tak zet a, Pi Maria CT Zuali lamah kan ṭang tlat a ni," an ti bawk.