Covid-19 vei enkawlna tur hawng

Lunglei Civil Hospital-ah nimin khan Health minister Dr R Lalthangliana chuan Covid-19 hri vei damlote enkawlna tur Dedicated Covid Health Centre (DCHC) a hawng. DCHC hi December 20, 2021 khan luah tan niin khum 28 - DCHC khum 20, High Dependency Unit (HDU) khum pali leh ICU khum pali te a awm a ni.

DCHC hawnna inkhawm hi Health secretary R Lalramnghaka'n a kaihruai a, Health minister Dr R Lalthangliana chuan Covid-19 hrileng do kawngah sorkar department hrang hrang, kohhran, tlawmngai pawl, khawtlang hruaitute leh Mizoram mipuite tanrualna chu chhunzawm zel a tul thu a sawi a, "Covid hri thar Omicron laka inveng turin Mizoram mipuite'n Covid Appropriate Behavior (CAB) kan ngaih pawimawh zel a ngai. Mizorama health infrastructure ti hmasawn turin sorkarin theihtawp a chhuah mek zel a, Lunglei khawpui ngeiah pawh 'Laboratory Block’, ICU leh Trauma Centre-te ruahman mek a ni," a ti.

Health Minister hian nimin vek khan BCCC leh Christian Hospital Serkawn hnenah Rs 30,000, Civil Hospital Lunglei, John Williams Hospital, Hnahthial District Hospital, Hope Hospital, Faith Hospital, Haulawng PHC, Tawipui PHC leh Lungsen PHC-te hnenah kumthar chibai bukna atan pawisa a pe a ni. Minister hi Lunglei HPC vice chairman Lawmawma Tochhawng, MLA-in a tawiawm.