Lok Sabha MP-in TNT Family Nite hmanpui

Thutak Nunpuitu Team (TNT) chuan December 31, 2021 kumhlui thlah zan khan TNT Family Nite an buatsaih a, Lok Sabha MP C Lalrosanga'n hmanpuiin TNT De-adiction centre hmun tihzauha a ṭulna hmuna lungrem sak a tum thu a sawi. TNT ṭanpuinan Rs 30,000 a pe bawk.

C Lalrosanga chuan kum 33 chhung TNT chu a ding tawh tih sawiin, "Pathian kaihhruainain mak tak maiin hei leh chen hi Pathian rawngbawlna ropui tak mai TNT kaltlangin hmuh a ni ṭhin a, thil mak tak takte pawh a lo thleng a ni tih kan hria a, a ropui ka ti hle mai. A bik takin zaninah hian kan hotupa hi a ngaihsanawm ka ti a, khawvelah hian lawmman pe ve tur ni ta ang ila lawmman ka pek hmasak ber tur te zing a mi a niin ka hria," a ti a, TNT dintu Dr Sangthankima hnathawh chu chhuanawm a tih thu a sawi.

TNT chu hnam dang zingah pawh a chhuang tih sawiin C Lalrosanga chuan, "Delhi-ahte pawh kan hnam dang ṭhiante hnenah TNT chanchin hi ka sawi ṭhin a, TNT ang hi khawvel hmun dangah pawh a awm awm lo. Centre ropui tak takte a lo awm tawh ṭhin a, nimahsela Pathian thua inkaihhruaina leh Pathian thu aṭanga damna thlenna leh hetiang khawpa rinnaa kalna centre hi khawvel hmun dangah a awm kher lo ang," a ti.