CM-in midangte tana malsawmna nih tum turin Mizo mipuite a chah

Chief minnister Zoramthanga chuan social media kaltlangin Mizoram mipuite kum thar 2022 chibai bukna thuchah a tichhuak a, midangte tana malsawmna nih tum ṭheuh turin a chah.

Zoramthanga chuan, "Pathian engkim titheia kaihhruainain kum 2022 kum thar chu kan lo chuangkai leh ta der mai. A hma­sa­in kum thar min hruai thlengtu Pathian hnenah lawmthu awm rawh se," a ti.

Hripui avangin Krismas leh kumthar hunpui pawh kohhranho leh mipui pawhin kan duhthusam leh beisei angin kan hmang thei lo ṭheuh tih tarlangin Chief Minister chuan, "Chutihrualin buaina leh harsatna lian tham awm loa heng Kristian-te ni pawimawh kan hmang thei erawh a lawmawm hle," a ti a, Mizoram mipuite chu midangte tana malsawmna nih tum ṭheuh turin a chah.

Zoramthanga chuan Kum 2022 kum bul kan lo ṭan hian Zoram mipui zawng zawngte kan hma lama tih tur kan hmachhawp ṭheuh te, kan eizawnna leh hna thawhah te, mimal, chhungkua leh khawtlang anga kan khawsak honaah te, midang tana harsatna thlentu ni loa malsawmna ni ṭheuh tur leh kan ramin kawng khat tala hma a sawn theihna tura kan ngaihtuahna leh tha leh zung seng ṭheuh tur sawmin, "Duhsakna ka hlan bawk che u a ni," a ti.

Mizorama chengte leh Mizoram pawna chengte pawh he kum thar hi an tan kum ṭha, kum duhawm leh malsawmna vur kum lo ni se a duh thu Chief Minister hian a tarlang a ni.