CYMA-in Champhai DC thlawp

Central YMA executive committee December 29, 2021-a an pisa-a ṭhukhawm chuan kuhva rah hmanga sumdawnna chungchanga Champhai DC Maria CT Zuali hma­lakna an thlawp. CYMA president R Lal­ngheta chuan kuhva rah hmanga sumdawnna chuan Mizote moral a tichhia-a an hriat thu a sawi.

CYMA CEC chuan kuhva rah tawlh chung­chang ngaihtuahin, "Dan loa sumdawnna titawp tura Champhai bawrhsap Pi Maria CT Zuali hmalakna hi CYMA chuan a thlawp tlat a ni. Dan loa sumdawnna kalpui mek hi tihtawp thuai a nih theih nan thuneitute ṭangruala hmala thuai turin kan ngen a ni," an ti.

Dan loa sumdawnna kalpui mekah YMA hruaitu leh member-te chu inhnamhnawih lo tura ngenin CYMA chuan, “Mizo hnam nun dan ṭha tichhe theitu leh tichhe mektu he sumdawnna hi tihtawp a nih theih nan hmalak chhunzawm zel remtih a ni,” an ti a, dan loa sumdawnna lo zir chiang turin committee an din nghal.

Vanglaini palai zawhna chhangin CYMA president R Lalngheta chuan kuhva rah hmanga sumdawnna chu dan loa kalpui ni ngeia an hriat thu sawiin, “A zirchiang tura kan din committee hian rang takin an zirchiang nghal turah kan ngai,” a ti.

R Lalngheta chuan dan loa kuhva rah hmanga sumdawnna chuan Mizote moral a tichhia a an ngaih thu sawiin, “Chuvangin ṭha kan ti lo a, tihtawp thuai kan duh a ni,” a ti a, dan anga sumdawnna ni se chuan YMA chuan inrawlhna chhan tur a neih loh thu a sawi