Hunpui vuakveta Mizorama thil thleng ṭhenkhatte

December 24
 Krismas urlâwk zanah khan Aizawl khawpui leh district khawpuite a rálmuang a, buaina, harsatna leh chetsualna lian tham thleng hriat a ni lo. Aizawla zan curfew kengkawh turin police-te an duty ṭha hle a, Aizawl SP mawhphurhna la mektu Rodingliana Chawngthu, Traffic SP chuan, zan dar 9 aṭanga curfew kalpui chu khauh taka an kenkawh dawn thu leh hmun hrang hrangah police duty an indah dawn thu a lo sawi tawh a ni.

 Urlawk niah Aizawl khawpui khawlai leh bazarte a lùn hle. Sumdawngte chuan ni dang ai chuan an inhralh ṭha zawk a, nikum ai pawhin an inhralh ṭha zawk tih an sawi.

December 25
 Isua Krista pian champha Krismas Mizoram pumah hlim taka lawm a ni. Krismas lawm nan hian kohhran pawl hrang hrangte'n chawhma, chawhnu leh zanah inkhawm an nei a, Isua pianna lam hawi thupui an ngaithla a ni. Kohhran tam tak chuan chawhma inkhawm bânah thingpui ruai an ṭheh a, kohhran eng emaw zatin ruaipui an ṭheh nghal bawk. Krismas lawm nan hian thingtlang lama kohhran tam zawk chuan Dec. 26 khan ruai an ṭheh a, Aizawlah erawh chuan kohhran tam berin ruai an ṭheh loh laiin ruai ṭheh tlem a zawng an awm bawk a ni.

December 27
 Mizorama kohhran hrang hrangte'n Krismas lawmna ruai hlim takin an ṭheh. Krismas lawmna ruai ṭhehtute hi a tam ber chu thingtlang lama awmte an ni a, Aizawlah pawh kohhran tlem azawngin ruai an ṭheh a, district khawpui dangah kohhran ṭhenkhatte'n ruai an ṭheh bawk. Krismas ruai hi December 26-ah ṭheh a ni ber a, kum 2021-ah chuan Pathianni a nih avangin Dec. 26 khan kohhran tam ber chuan an ṭheh a ni. Krismas ní, December 25-a ruai ṭheh nghal an awm nual bawk nia thu dawn a ni.

December 28
 KṬP General Conference Hla Bu, 2022 chu Central KṬP (CKṬP) leader Rev. Vanlalmuanpuia Khiangte-in Synod Conference Centre-ah Pathian hnena hlanin a tlangzarh. KṬP Gen. Conf. Hla Bu-ah hian hla pangngai 50 leh chorus hla pali dah a ni. Edition chi thum awmin, a pangngai Rs. 60 a ni a, spiral Rs. 80 niin, a bu hlai chi Rs. 170 man a ni.

December 29
 Social activist Vanramchhuangi chuan Myanmar aṭanga kuhva leh bungraw dang (border trade items) chungchangah Champhai Police Station-ah FIR a thehlut. Vanramchhuangi chuan FIR a thehluhah hian Myanmar aṭanga kuhva leh bungraw dang rawn kal velah hian Zokhawthar lam Land Custom Station (LSC) kaltlanga sumdawnna chu official record-ah tlemte a nih laiin, Mizorama bungraw lo lut hlutna Myanmar Ministry of Commerce website-in a tarlan danin, Rih Sector record-ah chuan October 2020 aṭanga September 30, 2021 thlengin sumdawnna chevel chu US dollar million 164.41 a ni a, India aṭanga Myanmar-in a lakluh chu US dollar million 0.880 chauh a ni thung.

Myanmar aṭanga Mizoram (India) a lakluhna record fel tak, chhiah (custom duty + GST) luhna record hmuh tur a awm lo tih chiang taka a lan thu tarlangin Vanramchhuangi chuan, "Hei hi GST lem emaw chhiah chawi tur zat ziah tlem luih a awm ngei niin a lang," a ti.

Vanramchhuangi chuan, mipui sum bawma lut tur cheng tam tak chhiah âwl rukna te, document lem leh dik lo nasa taka siam chawp tute leh dan loa chet velna hrang hrangte chhui chiang a, hetianga dan loa chet velnaa inhnamhnawih zawng zawngte zawng chhuaka a ṭul angin an chungah dan anga hmala turin a ngen.

 Tourism department chuan Winter Festival 2021 pualin Ngaizela K Lalnghakliana Filling Station leh Lungleng Lal In inkarah Heritage Walk an buatsaih a, zingah Tourism minister Robert Romawia Royte in a vailiam. Heriatage Walk-ah hian km 18.2 a thui ke a kal tur niin mi 217 an tel a ni

 Aizawl DC Dr Lalhriatzuali Ralte chuan hunpui hman mekah Covid-19 hripui laka fimkhur turin Aizawl district mipui a chah a, curfew hmaa in peihfel hman turin dawrkai leh pawnchhuakte a hriattir.

December 30
 Health & Family Welfare (HFW) minister Dr R Lalthangliana chuan Lunglei Zotlanga Old Tourist Lodge building-ah Makeshift RT-PCR Laboratory a hawng.

Dr R Lalthangliana chuan RT-PCR Laboratory hawn tak chu Mizoram chhimlam district-te tan hmasawnna mellung pawimawh tak a nih thu a sawi a, "He laboratory ti hlawhtling tura theihtawp chhuahtu Lunglei district MLA-te, HFW department, officials dangte leh an hmunhma phal taka hman tirtu Tourism department chungah ka lawm hle. Civil Hospital Lunglei compound chhungah 'Laboratory Block’ changtlung tak ruahman mek a ni bawk," a ti a, Thermo Fisher 7500 RT-PCR khawl donate tu Thorang bialtu MLA Zodintluanga leh NGO Coordination Committee member zawng zawngte chungah a lawmthu a sawi bawk.

 Chief minister Zoramthanga chuan Industrial Growth Centre (IGC), Luang­mualah hmasawnna atana hmalakna awm tura ruahmante a enfiah a, sorkar hotute nen IGC hman ṭangkai belh zel dan tur an enho nghal.

Zoramthanga hian small, medium & micro industry lama Mizoramin hmasawn theihna (potential) tam tak a neih thu te, a remchanna apianga privatization kalpui ṭha a tih thute leh mipui tan hlawkna a tam thute a sawi.

Chief Minister hi Aizawl West-I bialtu MLA Zothantluanga, Commerce & Industries director Florence Zotluangpuii leh department hotute'n an tawiawm a ni.