Halpuah/halmawi khap a hlawhtling lo ; Police-in mi paruk thubuai an siamsak

Mizoram sorkar chuan halpuah, halmawi, sky lantern leh silai lem a mu kap chhuak thei khap leh mah se, kumdang ang bawkin December 31 zanlaiah halpuah leh halmawi ri hriat tur leh hmuh tur Aizawlah chuan a tam hle. Halpuah/halmawi hal avangin police-te chuan mi paruk thubuai siam sak tawhin, chhui chian mekte pawh an la nei.

Halpuah, halmawi etc. khapna thupek hi DC-te chuan an district atan an chhuah hlawm a, mipuite chu halmawi, halpuah etc. zuar lo tur leh hal lo tura ngen an ni. Branch YMA-te pawhin Central YMA thu angin an huam chhungah halmawi, halpuah etc. hi an khap a, information mike leh social media kaltlangin mipuite an hriattir a ni.

Police-te chuan halpuah, halmawi etc. hi an vai reng a, thubuai siam sakte pawh an nei. Hetihlai hian a bik takin Aizawlah chuan December 31 zantir aṭang khan halpuah ri leh halmawi hmuh leh hriattur a khat tawkin a awm reng a, zanlaiah phei chuan a nasa zual a ni.

Aizawl District Police-te chuan December 31,2021 aṭanga January 1, 2022 chhungin halpuah leh halmawi hal mi paruk man tawhin, thubuai an siam sak. Halpuah/halmawi hal ngeia hriat, chhui chian mek an la nei a, an hal ngei tih finfiah a nih chuan man an ni ang.

Police hotute hnen aṭanga Vanglaini thudawn danin, halpuah leh halmawi hal mi paruk an mante hi thubuai siam sak an ni. Mi paruk bakah hian midang chhui chian mek an awm a, chungte chuan halpuah leh halmawi an hal tih finfiahna a awm a nih chuan man leh an ni ang. Tarlan tawh angin khap nimah se, Aizawl khawpui chhungah kumhlui thlah zanah halpuah leh halmawi ri hriat tur leh hmuh tur a tam hle a ni.

Kumhlui thlah zanah halpuah, halmawi etc. khapna thupekin zawm a hlawh lo bak chu dan bawhchhiatna liantham thleng a awm hriat a ni lo thung. Police-te chu Aizawl khawpuiah hmun 20 bakah Aizawl khawpui luh ṭanna hmun 6-ah an duty a ni

Kum 2020 hunpui lai khan halpuah, halmawi etc. vangin thubuai 22 ah mi 28 lakah thubuai ziahluh a ni.