Kum 15-18 inkarte hnenah Covaxin pe ṭan

India ram pumah nimin aṭang khan kum 15 - 18 inkarte hnenah Covid-19 laka invenna damdawi (vaccine) pek chhuah ṭan a ni a, Mizoramah pawh Health & Family Welfare (HFW) minister Dr R Lalthangliana hoin PC Girl’s School, Mission Vengah Covaxin vaccine pek chhuah ṭan a ni.

Health Minister chuan ṭhalaite tana vaccine pekchhuah a ni ta chu lawmawm a tih thu a sawi a,"Hun rei tak aṭanga kan lo nghahhlelh tawh a ni a, zirlaite tan a bik takin phai lama zirna chhunzawm tumte tan vaccine lak theih a ni ta hi a ṭangkai hle dawn a ni," a ti a, kum 15 - 18 inkar zinga a tam ber chu zirlai an nih a rinawm avangin zirna-in behchhan ang zawnga vaccine pek hna kalpui a ṭhat a rin thu leh ruahmanna ṭha leh mumal tak nena kalpui a ṭul thu a sawi.

Mizoram chu India ram state hrang hrang zingah vaccine pek chhuah hna thawk ṭha ber zinga mi a nih thu sawiin Health Minister chuan,"Hemi atana theihtawp chhuahtu Health department official-te, frontline workers leh volunteer-te, ASHA, health worker leh health & wellness officer-te, vaccination team hrang hrang hmun kilkhawr ber ber thleng kala damlo leh tar chak lote an chenna ngeia luhchilhtute hnathawh ṭhat rah leh lo buaipuitu leh lo ngaihsaktu khawtlang hruaitute, YMA leh LLTF/VLTF-te ṭawiawmna vang a ni," a ti.

Health Minister chuan vaccine lak vanga inthlahdah tur a nih loh thu te, Covid-19 hrik thar Omicron in Mizoram a luh hun tur hriat a nih loh thu te, Omicron vangin India ram state tam zawkah inkhuahkhirhna an kalpui leh tawh thu leh khawpui lian ṭhenkhatah zan curfew an kalpui leh tawh thu te, West Bengal-ah chuan kum thar aṭang hian tiam chin awm loin zirna-in an khar thu leh mipui punkhawmna hmun leh intawllenna hmun an khar thu te, sorkar pisa pawh staff awm zat 50% a kal tura hma an lak leh tawh thute a sawi bawk.

National Health Mission (NHM) mission director Dr Eric Zomawia chuan kum 15 – 18 inkarte tan sorkar laipuiin Covaxin vaccine a ruahman thu a sawi a, “India ram pumah January 2, 2022 (Sunday) aṭanga pek ṭan tur tih a ni a, December 30, 2021 khan Aizawlah Covaxin hi dose 67,000 a rawn thleng. Mizoramah chuan hun a tepter bakah holiday-te a nih avangin Aizawlah chauh vawiinah hi chuan a hawnna pual hian kan pe thei a, district dang aṭang pawhin vaccine hi an rawn la ang,” a ti a, district dangah chuan tun kar tawp lamah an pek ṭan theih a rin thu a sawi.

He huna tarlan dan a nih danin, Mizoramah kum 15 – 18 inkar vaccine la thei 1,00,000 vel an awm nia chhut a ni a, vaccine dose mamawh zat hi sorkar laipui aṭanga dawn belh zel tur a ni. Covaxin hi first dose an lak aṭanga ni 28-ah second dose lak leh tur a ni. Vaccine pek chhunzawm zel dan turah chuan district tina District Immunization Officer-te’n ruahmanna an siam ang.

PC Girls School-ah hian kum 15 – 18 inkar mi 30 hnenah Covaxin pek nghal an ni a, vaccine pek chhunzawm dan tur hi HFW department in ruahmanna a siam dawn a ni. Vaccine pek hawnna inkhawmah hian NHM mission director Dr Eric Zomawia, Health secretary R Lalramnghaka, HFW principal director Dr F Lallianhlira, Covid-19 spokesperson Dr Pachuau Lalmalsawma leh official dangte an tel.

Covid-19 vaccine la turte hriattur :
1) Kum 15- 18 inkar Covaxin late hian vaccine chi dang an lak a rem lo a, Covishield la tawhte pawhin second dose atan vaccine chi dang lak a rem lo
2) Vaccine pekna hmunah hian kum 15 - 18 inkarte tan leh kum 18 chunglamte vaccine pekna hmun a hranpa a siam tur a ni
3) January 10, 2022 aṭangin India sorkar chuan healthcare worker, frontline worker leh kum 50 chin chunglam natna benvawn (comorbidities) neite zinga vaccine dose hnih la tawhte hnenah 'precaution dose' pek ṭan tura ruahman a ni
4) Precaution dose dawng thei turte chu vaccine vawi hnih an lakna aṭanga thla kua (ni 270) a liam tawh tur a ni
5) Healthcare workers leh frontline workers-te chu Cowin-ah register sa vek an ni a; tun dinhmunah chuan heng Cowin-a in register sa, dose hnih dawng tawhte chauhin precaution dose an dawng thei
6) Kum 60 chunglam natna benvawn nei, precaution dose la duhte chuan anmahni doctor ṭheuh an rawn ang a, an doctor in la tura thurawn an pek chuan an la thei ang
7) Precaution dose atan hian eng vaccine nge hman tur tih leh engzat nge a dose tur tih chu Ministry of Health & Family Welfare-in ruahmanna a la rawn siam dawn a ni