KHAWTHLIR

IFS kaisang
Ministry of External Affairs chuan December 31, 2021 khan order chhuahin, Vanlalhuma, Indian Foreign Service (IFS) tuna Bratislava, Embassy of India-a ambassador ni mek chu grade I of IFS-ah a kaisan thu an tarlang. Thudawn danin, Vanlalhuma hi sorkar laipuiah addl. secretary rank a ni mek a, a kaisan hnu hian secretary rank a ni.

MP-in hmanpui
Thutak Nunpuitu Team (TNT) chuan December 31, 2021 kumhlui thlah zan khan TNT Family Nite an buatsaih a, Lok Sabha MP C Lalrosanga'n hmanpuiin TNT De-adiction centre hmun tihzauha a ṭulna hmuna lungrem sak a tum thu sawiin, TNT ṭanpuina atan Rs 30,000 a pe bawk.

Ruang chhar
Nimin chawhma dar 11 vel khan Bagha, Assam-ah Mizo ruang chhar a ni a, Saithangpuia s/o Chawngkhuma, Khawzawl nia hriat a ni. Vairengte aṭanga thudawn danin, Saithangpuia hian hnamdang motor khalh a zui a, driver-te hi Bagha mi niin, an inah an riak a ni. A tuk chawhma dar 11 vela motor-a an kal chu a chhung lamah a lo inkalh a, an hawn hnuah Saithangpuia hi thia hmuh a ni. Vairengte Joint YMA hruaitute chu a hmunah kalin, postmortem loa ruang lak an dil a, mahse Dholai Police chuan dan anga postmortem phawt ṭha tih avangin he thuziah lai hian postmortem turin ruang hi lak a ni.