Covid-19 hri vei 152 hmuh belh

January 2, Pathianni khan Mizoramah Covid-19 hri vei 152 hmuh chhuah a ni a, nimin tlai dar 5 thleng khan Covid-19 laka fihlim tawh mi 241 chhuah tir an ni a, hripui vanga thi pakhat a awm.

December 23, 2021 khan Mizoram sorkar chuan RT-PCR leh RAT hmanga swab sample endikna hawn leh khar dan tur a ti chhuak a; January 2, Pathianni aṭang khan RT-PCR hmanga dan pangngaia swab sample endik leh tura tih ni mah se Pathianni khan RT-PCR hmanga swab sample endik a awm lo.

Pathiannia hri vei hmuh chhuahte chu RAT hmanga hmuh 146 leh FIA hmanga hmuh paruk an ni a, TrueNAT hmanga endik zingah hri vei an awm lo.

Nimin tlai dar 5 thleng khan Mizoramah Covid-19 hri vei 1,41,901 an awm tawh a, heng zinga mi 1,39,864 (98.56%) chu hripui lakah an fihlim tawh. Hri vei zinga 548 (0.38%) an thi tawh a, enkawl mek 1,489 (1.04%) an la awm.

January 2, Pathiannia hri vei hmuh 152-te hi mipa 66 leh hmeichhia 86 an ni a, symtoms nei 114 leh symptoms nei lo 38 an ni. Kum 2011 chhiarpui aṭanga chhûtin, Mizorama Covid-19 vei hmuh tawh 1,41,901 chu mi 1,000 zelah hripui vei mi 129 an awm ang a ni a; mi 1,00,000 zela Covid-19 vangin mi 49 an thi tawh ang a ni tih sorkar thuchhuakin a tarlang.

IDSP tarlan danin, nimin tlai dar 5 thleng khan district pariat aṭangin hripui vei dam tawh mi 241 chhuahtir an ni. Nimin zing 8-a sorkar laipuiin India ram Covid-19 dinhmun a tarlan danin, hri vei hmuh chhuah tawh (total case) aṭanga enkawl mek (active case) tam lamah Mizoram (1.22%) chu state/UT 36 zinga a sang ber leh 1% aia sang awmna awmchhun a ni bawk.

Hri vei hmuh chhuah tawh aṭanga thihpui tam lamah erawh Mizoram chu Dadra And Nagar Haveli And Daman And Diu (0.04%) dawta a hniam ber (0.38%) a ni mek thung.