Mizorama ramhmul damdawi siam zingah License nei leh GMP paltlang an awm lo

Mizorama ramhmul damdawi siam chhuaktu zingah, damdawi siam phalna manufacturing license leh license nei tura Good Manufacturing Practices (GMP) paltlang tur chi hrang hrang paltlang an awm lo. License nei loa siam chhuah ramhmul damdawite uchuak taka fakmawina tichhuakte chu dan hmanga hrem theih an ni.

National AYUSH Mission (NAM) hotute chuan, Mizorama ramhmul damdawi siamtute'n siam phalna manufacturing license an neih loh vek bakah, license nei tura GMP paltlang tur chi hrang hrang an paltlang lo vek tih an sawi a; chuti chung chuan ramhmul damdawi siamte chu uchuak taka fakmawi an chín thu leh, chutianga tih chu dân hmanga hrem theih a nih thu an sawi a ni.

Mizoramah mahnia ramhmul damdawi siam chhuak tam tak an awm thu sawiin NAM hotute chuan, "Mahnia ramhmul damdawi siam chhuaktute hian natna chi hrang hrang atana a ṭha nia chhálin, an damdawi siam chhuahte chu man to tam taktein an zuarin an hralh chhuak mek a ni," an ti a; mipui pawhin an lei nasa hlea an hriat thu an sawi.

NAM hotute chuan, social media leh chanchinbu thlengin ramhmul damdawi fakna an hmuh thu te, ramhmul damdawi siam chhuah zingah AYUSH Drug Testing Laboratory, Zemabawka endik vek tawh anga inchhálte pawh an awm tih an hriat thu te, chutianga inchhál an awm ṭhin chu thu dik lo a nih thu an sawi a, "AYUSH Drugs Testing Laboratory-ah hian ramhmul damdawi siam chhuahte hi mihringa a thawh dan enfiah a ni lo a, ei atan a thianghlim leh thianghlim loh chauh en a ni," an ti.

NAM hotute chuan, "Mahnia ramhmul damdawi siamtute'n an siam dan leh sâwngbâwl danah fel lo tam tak a awm. Dan anga damdawi siam chhuak turin tehna paltlang tur tam tak a awm a; damdawi siam phalna (manufacturing license) neih phawt a ngai a, license nei tur hian GMP paltlang a ngai bawk," an ti a; tun dinhmunah Mizoram ramhmul damdawi siam zingah GMP paltlang leh license nei an la awm loh thu an sawi.

AYUSH hotute chuan, damdawi siamtu ṭhenkhat chuan an damdawi siamte chu uchuak taka an fakmawi ṭhin thu sawiin, "Thauna, chhûl chakna, vun nalhna, mipat hmeichhiatnaa thothâng ṭhatna a nih thute TV leh chanchinbuahte an chhuah a, hei hi dân kalh niin, Drugs & Magic Remedies Objectionable Advetisement Act, 1954 hmanga hrem theih a ni," an ti.

NAM hotute chuan, damdawi chu mihring taksaa a ṭha lama hna thawk tura dân ang taka sâwngbâwl thil sawina a nih thu sawiin, "A siam dan tur lehkhabu behchhana siam chhuah a ni tur a ni. Ayurvedic leh Homoeopathic damdawi bikah chuan, Ayurvedic Pharmacopoeia of India (API) leh Homeopathic Pharmacopoeia of India (HP) behchhana siam vek an ni tur a ni," an ti a; Ayush Drugs Testing Laboratory-ah huan dan anga damdawi siam chhuah nia chhàl, mihringa a thawh dan rinhlelhawm si ang chu an enfiah ṭhin thu an sawi.

Hetih rual hian, NAM hotute chuan, ramhmul damdawi siam chhuah dan leh zawrh danah tehfung paltlang awm lo mah se, Mizorama damdawi siam chhuahte chu ṭha tak tak a ni tho niin an sawi bawk.

NAM hotute sawi danin, AYUSH Drugs Testing Laboratory atan hian sorkarin drugs inspector (ASUH) a dah tawh a; dânin thuneihna a pek angin drugs inspector chuan damdawi dàwra damdawi endik ngai nia a hriatte chu Form 17A hmangin a la ang a, laboratory-ah a endik ṭhin dawn a ni.

Ministry of AYUSH-in State Drugs Testing Laboratory, Zemabawka ramhmul damdawi enfiah chu December 2017-ah a rawn khap tawh avangin, drug Inspector-in a lak khawmte leh sawisel neite chauh an enfiah tawh dawn niin NAM hotute chuan an sawi a; sorkar damsdawi-in hrang hrangah Homoeopathy doctor leh Ayurvedic doctor-te ràwn tur an awm reng avangin, mahnia ramhmul damdawite ei mai lo a, doctor thurâwn anga damdawi ei turin mipui an chah bawk.